ბოლო წლებში სულ უფრო მეტი ადამიანი საუბრობს ღიად საკუთარ იდენტობაზე. მათ შორის არიან არაბინარული გენდერული იდენტობის მქონე ადამიანებიც. არაბინარული გენდერული იდენტობა არ განეკუთვნება გენდერის ბინარულ გაგებას, რომლის მიხედვითაც ნებისმიერი ინდივიდი შეიძლება იყოს ან კაცი, ან ქალი.

ამ სტატიაში 6 ცნობილ ადამიანზე გესაუბრებით, რომლებიც არაბინარული გენდერული იდენტობის მქონედ იდენტიფიცირდებიან.

1. ბელა რემზი (ნაცვალსახელები — They/Them)

GOT-ისა და The Last Of Us-ის ვარსკვლავი ბელა რემზი 2023 წლის დასაწყისში გენდერფლუიდად დაქამინგაუთდა და თქვა, რომ საბუთების სქესის გრაფაში "არაბინარულს" უთითებს ხოლმე. გენდერფლუიდი ადამიანები ისინი არიან, ვისი გენდერის გამოხატვის ფორმები ან/და იდენტობა დროთა განმავლობაში იცვლება. ბელამ ვოგთან ინტერვიუში იმაზეც ისაუბრა, როგორი იყო მისი გამოცდილება ქამინგაუთის შემდეგ.

"როცა The Last Of Us გამოვიდა, ვღელავდი იმაზე, როგორ მომმართავდნენ მაყურებლები და ვამბობდი, უბრალოდ მდედრობითი სქესის ნაცვალსახელი She გამოიყენეთ, რადგან გოგოდ აღმიქვამთ-მეთქი. ახლა უფრო მეტად შემიძლია ამ თემაზე ღიად საუბარი. ნეიტრალურ ნაცვალსახელ They-სთან ყველაზე მეტად ვაიგივებ საკუთარ თავს, ესაა, ვინც ყველაზე მეტად ვარ", — ამბობს რემზი.

2. ელიოტ პეიჯი (ნაცვალსახელები — He/They)

The Umbrella Academy-ის ვარსკვლავმა ელიოტ პეიჯმა 2020 წელს ინსტაგრამზე ემოციური პოსტი გაავრცელა, სადაც ამბობს, რომ არაბინარული გენდერული იდენტობის მქონე ტრანსგენდერია. მისი თქმით, საკუთარი თავის მიღებასა და შეყვარებაში ტრანსგენდერთა თემიდან უამრავი ადამიანი დაეხმარა მათ მხარდაჭერას თავადაც აგრძელებს.

"გამარჯობა მეგობრებო, მინდა გითხრათ, რომ ტრანსგენდერი ვარ, ჩემზე საუბრისას გამოიყენეთ ნაცვალსახელები he/they და მე მქვია ელიოტი. ძალიან იღბლიანი ვარ, რომ ამის თქმა შემიძლია, რომ აქ ვარ, რომ ჩემს ცხოვრებაში აქამდე მოვაღწიე", — წერს მსახიობი.

3. დემი ლოვატო (ნაცვალსახელები — She/They)

მომღერალი დემი ლოვატო ლგბტქ თემს წლების განმავლობაში აქტიურად უჭერდა მხარს. ის 2021 წელს დაქამინგაუთდა და განაცხადა, რომ არაბინარული გენდერული იდენტობის მქონეა. მომღერალმა თავის სექსუალურ ორიენტაციაზეც ისაუბრა და დაამატა, რომ პანსექსუალია, რაც აღნიშნავს პიროვნებას, რომელსაც ნებისმიერი გენდერული იდენტობის მქონე ადამიანი იზიდავს.

"არაბინარული გენდერული იდენტობის მქონედ ყოფნა ნიშნავს, რომ მე ბევრად მეტი ვარ, ვიდრე კაცისა და ქალის ბინარული სისტემა და ჩვენ ვართ ბევრად მეტი, თუკი საკუთარ თავს გულში ჩახედვის შესაძლებლობას მივცემთ და კითხვის ნიშნის ქვეშ დავაყენებთ ბინარულ სისტემას, რომელშიც გავიზარდეთ", — აღნიშნა ლოვატომ.

4. სემ სმიტი (ნაცვალსახელები — They/Them)

გრემის ოთხგზის მფლობელმა სემ სმიტმა 2019 წლის მარტში განაცხადა, რომ მთელი ცხოვრების განმავლობაში საკუთარ იდენტობასთან ბრძოლის შემდეგ გადაწყვიტა, რომ საკუთარ თავს ისეთს იღებს, როგორიც არის. მომღერალი თავს არაბინარული გენდერული იდენტობის მქონე პიროვნებად აიდენტიფიცირებს და ამბობს, რომ ურჩევნია, მასთან მიმართებაში ნეიტრალური ნაცვალსახელები they/them გამოიყენონ. 2022 წელს სმიტი პირველი ღიად არაბინარული გენდერული იდენტობის მქონე მომღერალი გახდა, რომელიც ბილბორდის ლიდერი იყო.

"მესმის, რომ ბევრ შეცდომასა და არასწორი ნაცვალსახელით მოხსენიებას უნდა ველოდო, თუმცა მხოლოდ იმას გთხოვთ, რომ ეცადოთ. იმედი მაქვს, ისეთად აღმიქვამთ, როგორადაც საკუთარს თავს ვხედავ. მადლობა", — ამბობს პოპვარსკვლავი.

5. ემა დარსი (ნაცვალსახელები — They/Them)

დრაკონის სახლის მსახიობი ემა დარსი არაბინარული გენდერული იდენტობის მქონე ადამიანად იდენტიფიცირდება და ამბობს, რომ საკუთარ რეალურ მეზე დიდხანს ინდუსტრიაში წარმატების მიღწევის გამო ამბობდა. მისი თქმით, ყველაზე მნიშვნელოვანი ის არის, რომ ტრანსგენდერი და არაბინარული ადამიანებისთვის თანდათან უფრო მეტი სივრცე იქმნება.

"როდესაც კარიერას ვიწყებდი, დარწმუნებული ვიყავი, რომ წარმატების მისაღწევად აუცილებელი იყო, ინდუსტრიაში თავი ქალად დამემკვიდრებინა. შემდეგ კი, როცა ტყუილში ცხოვრება შევწყვიტე, ოქროს გლობუსზე საუკეთესო მსახიობის კატეგორიაში ზუსტად ამ დროს წარმადგინეს, რაც ირონიულად მშვენიერია", — აცხადებს დარსი.

6. ემა კორინი (ნაცვალსახელები — They/Them)

ინგლისელი მსახიობი ემა კორინი, რომელიც ნეტფლიქსის გახმაურებულ სერიალში The Crown პრინცესა დაიანას განასახიერებს, ამბობს, რომ გენდერის ბინარულ სისტემაში არ ჯდება. მსახიობის გენდერალურად ნეიტრალური ნომინაციების მნიშვნელობაზეც საუბრობს და ამბობს, რომ ეს იმისთვისაა საჭირო, რომ "ყველამ იგრძნოს თავი მიღებულად და წარმოდგენილად".

"ჩემი აზრით ყველაფრის გასაღები ხილვადობაა. ძალიან დიდი ხანი დამჭირდა იმის გასააზრებლად, რომ ბინარულ სისტემაში არ ვჯდები და სადღაც შუაში ვარ, თუმცა სად, ჯერ არ ვიცი", — აღნიშნავს მსახიობი.

ამავე თემაზე:

• 10 ქვიარ ვარსკვლავი, რომელსაც დაქამინგაუთებას უშლიდნენ
• ბელა რემზის თქმით, გენდერულად დაყოფილ ნომინაციაში წარდგენა მისთვის "უსიამოვნოა"
• The Crown-ის ვარსკვლავს დაჯილდოებებზე გენდერულად ნეიტრალური ნომინაციები სურს
• სემ სმიტი: ჩემი პირველი ალბომი ქვიარ პერსპექტივიდანაა დაწერილი