ამის შესახებ პარლამენტის თავმჯდომარემ ჟურნალისტებთან ისაუბრა.

რატომ არის მნიშვნელოვანი: მას შემდეგ, რაც მმართველ გუნდს რუსული კანონის ჩაგდება მოუწია, ქართული ოცნება არასამთავრობო ორგანიზაციებისა და ოპოზიციური პარტიების შეზღუდვის ახალ მექანიზმებს ეძებს.

  • პაპუაშვილმა რამდენიმე პარტია ჩამოთვალა და ამტკიცებს, რომ გირჩი — მეტ თავისუფლებას, დროასა და ევროპულ საქართველოს ყალბი არასამთავრობო ორგანიზაციები აქვთ ჩამოყალიბებული და უკანონო დაფინანსებას იღებენ.
  • "ხდება გრანტად გაფორმება პოლიტიკური ფულისა, რომელიც არის კიდევ ერთელ უკანონო დაფინანსება პარტიების, ამიტომ, მნიშვნელოვანია, რომ აუდიტის სამსახური დაინტერესდეს ამ საკითხით და ზოგადად, ამ ორგანიზაციებმაც გაასაჯაროონ საკუთარი დაფინანსება".

პაპუაშვილს, ასევე, უნდა დაფინანსებმა გაასაჯაროონ ორგანიზაციებმაც, მათ შორის დონორებმა, ასახელებს IRI-ს და მის დისკრედიტაციას ცდილობს.

  • "თუნდაც IRI-მ, გაასაჯაროოს რა მოცულობის თანხით აფინანსებს ამ ე.წ. ენჯეოს, რომელიც სინამდვილეში გირჩის პარტიის დაგრძელებაა, რა მიზნებისთვის აფინანსებს, რატომ ხდება IRI-ს მიერ გადახდილი ფულით იარაღთან შეჩვევა ახალგაზრდების და რატომ ხდება რევოლუციური სცენარების დანერგვა", — ამბობს ის.

გამოხმაურებები: გირჩი — მეტი თავისუფლების ლიდერის, ზურაბ ჯაფარიძის განცხადებით, ქართული ოცნების მიზანი არის ის, რასაც რუსული კანონით ვერ მიაღწიეს.

  • "მიზანი არის ის, რომ დასავლური დაფინანსება, რომელიც შემოდის ამ ქვეყანაში, მათ შორის, რომელიც ეხმარება სხვადასხვა პოლიტიკურ პარტიას პარტიის მშენებლობაში და შიდა დემოკრატიის განვითარებასა და მსგავს რაღაცებში, რაც ხდება ამ ქვეყანაში ბევრი წელია, მოყოლებული დამოუკიდებლობის მიღების შემდეგ, რომ ეს პროცესი შეაჩერონ".
  • ევროპული საქართველოს წევრის, აკაკი ბობოხიძის თქმით, ნიშანდობლივია, რომ პაპუაშვილი დასავლური დაფინანსებით ინტერესდება და არა პრორუსული ორგანიზაციების უცნობი დაფინანსების წყაროებით.
  • "პაპუაშვილს მინდა შევახსენო, რომ ქართული ოცნება არის ყველაზე მსხვილი ორგანიზაცია, რომელსაც გაზპრომის მსხვილი აქციონერი, ბიძინა ივანიშვილი აფინანსებს", — ამბობს ის.