ფილიპინების მკვიდრი აბორიგენული ტომის წარმომადგენელი, 106 წლის აპო ვანგ-ოდი, ყველაზე ასაკოვანი ადამიანი გახდა, რომელიც პრესტიჟული ჟურნალის, Vogue-ის, გარეკანზე გამოჩნდა. როგორც ჟურნალის ფილიპინური გამოცემის რედაქტორი ბეა ვალდესი ამბობს, რედაქციაში ერთხმად გადაწყვიტეს, რომ ახალი ნომრის ყდაზე სწორედ ვანგ-ოდი ყოფილიყო. მიზანი მარტივია — სილამაზის მრავალფეროვნების ჩვენება.

ვოგის ახალი ვარსკვლავი ფილიპინების ჩრდილოეთით, კალინგის პროვინციის მაღალმთიან სოფელში, ბუსკალანში, ცხოვრობს. იგი მამბაბატოკია — კალინგის ტრადიციული ტატუირების ოსტატი. ტატუირების ეს მეთოდი, რომელსაც ბატოკი ჰქვია, სხეულზე ნახატის ეკლითა და ბუნებრივი საღებავით გამოსახვას გულისხმობს.

თავად ვანგ-ოდს ტატუირების სწავლა 16 წლის ასაკში დაუწყია, დღეს კი თავისი თაობის უკანასკნელ მამბაბატოკადაც მიიჩნევა. მის მშობლიურ ტომში ტატუთი სხვადასხვა რამეს აღნიშნავენ: ძლიერებას, სიმამაცეს, მშვენიერებას. თუმცა, ვანგ-ოდს სხეული არა მხოლოდ თანასოფლელებისთვის, ათასობით ტურისტისთვისაც მოუხატავს.

"ვიფიქრეთ, რომ იგი ზუსტად გამოხატავდა ფილიპინური კულტურის მშვენიერების იდეალებს", — ამბობს რედაქტორი ვალდესი, — "მიგვაჩნია, რომ სილამაზის ცნებას განვითარება სჭირდება, რათა მოიცვას მრავალფეროვანი სახეები და ფორმები. ვიმედოვნებთ, ამით ადამიანობის მშვენიერებასაც წარმოვაჩენთ".

ვანგ-ოდი კი საქმიანობის შეწყვეტას არ გეგმავს — ამბობს, სანამ მხედველობა ხელს შემიწყობს, ტატუირებას განვაგრძობო. თუმცა, მას იმითაც შეუძლია თავი ინუგეშოს, რომ საქმის გამგრძელებლები ჰყავს; რადგან მამბაბატოკს მხოლოდ შთამომავლებისთვის შეუძლია თავისი ცოდნის გადაცემა, ქალი ტატუირების ტრადიციულ ხელოვნებას ახლა თავის დის შვილიშვილებს ასწავლის.