ნატალია ჰარელი 6 კვირის ორსული იყო, როცა ქალი ცეცხლსასროლი იარაღით სასიკვდილოდ დაჭრა. ახლა ის ციხეშია და სასამართლო პროცესს ელოდება, თუმცა ამტკიცებს, რომ მის ნაყოფს უკანონოდ აკავებენ. ნატალიას ადვოკატის თქმით, ციხის პერსონალმა საფრთხე შეუქმნა ნაყოფს "დაბადებამდე შესაბამისი და აუცილებელი მოვლის პირობების" არარსებობის გამო.

ადვოკატის არგუმენტი ეფუძნება იმ კონცეფციას, რომ მუცლადმყოფი ბავშვი სრული უფლებების მქონე ადამიანია. იდეა იმის შესახებ, რომ მუცლადმყოფი ბავშვი კონსტიტუციური დაცვის ქვეშ მყოფი პირია მას შემდეგ გავრცელდა, რაც აშშ-ის უზენაესმა სასამართლომ აბორტის კონსტიტუციური უფლება გააუქმა. "მუცლადმყოფი ბავშვი არის პიროვნება, როგორც ეს ფლორიდისა და აშშ-ის კონსტიტუციითაა განსაზღვრული", — ვკითხულობთ ნატალიას ადვოკატის მოთხოვნაში.

ადვოკატმა განაცხადი მუცლადმყოფი ნაყოფის სახელზე შეიტანა და სასამართლოს მოუწოდებს, რომ ჰარელი ბავშვის დაბადებამდე ციხიდან გაათავისუფლოს."მუცლადმყოფ ბავშვს დედისგან დამოუკიდებლად აქვს უფლებები, იმის მიუხედავად, რომ ის ჯერ კიდევ საშვილოსნოშია", — ვკითხულობთ განაცხადში.

ნატალია ჰარელს იმ ქალის მკვლელობაში ედება ბრალი, რომელთან ერთადაც მოგზაურობდა. 24 წლის ნატალია მკვლელობაში ბრალს არ აღიარებს. ადვოკატის თქმით, ბრალდებული თავს იცავდა და იარაღი მისი და მისი შვილის სიცოცხლის დასაცავად გამოიყენა. ადვოკატი იმასაც ამტკიცებს, რომ ნატალიას ციხეში არ მიუღია ის საკვები და ვიტამინები, რომელიც ორსულისთვისაა საჭირო და ასევე, ბრალდებული ექიმთან დაგეგმილ ვიზიტებზე არ მიჰყავთ.

ბავშვის მამა აცხადებს, რომ ის მუცლადმყოფი ნაყოფის კეთილდღეობაზე ღელავს. "არ მინდა, ბავშვი ნაადრევად ან წონანაკლული დაიბადოს. საშინელი პირობებია და ვგრძნობ, მას ისე არ უვლიან, როგორც წესია" — ამბობს ბავშვის მამა.