დღეს მთავარმა არხმა, ფორმულამ და TV პირველმა კრიტიკული მედიისთვის შექმნილი პრობლემების შესახებ ერთობლივი განცხადება გაავრცელა.

რატომ არის მნიშვნელოვანი: ჟურნალისტებმა ნიკა გვარამიას შეწყალების მოთხოვნით საქართველოს პრეზიდენტს პირდაპირ ეთერში მიმართეს.

  • კრიტიკული მედიის წარმომადგენლები აცხადებენ, რომ ნიკა გვარამიას განსათავისუფლებელი მოძრაობა სინამდვილეში არის მოძრაობა საქართველოს თავისუფლებისთვის და ევროპული მომავლისთვის.
  • ტელეკომპანიების წარმომადგენლები დავით კეზერაშვილის წინააღმდეგ მიმდინარე დავას, რომელიც 27 თებერვლისთვის გადაიდო, ფორმულას დახურვის მცდელობად მიიჩნევენ.

დეტალები: ჟურნალისტების განცხადებით, ნიკა გვარამია, რომელიც აბსურდული ბრალდებითაა დატყვევებული, ბიძინა ივანიშვილის პირველი პოლიტპატიმარია.

  • მათი შეფასებით, გვარამიას დევნა ივანიშვილმა ხელისუფლებაში მოსვლისთანავე დაიწყო და იგი დღეს მოუთვინიერებლობისთვისაა დაკავებული.
  • "ჩვენ თითქოს შევეგუეთ ამ უსამართლობას. როდემდე არ გავაპროტესტოთ რომ კერძო მანქანის გამოყენების ბრალდებითაა დაკავებული ნიკა გვარამია", — განაცხადა ჟურნალისტმა ინგა გრიგოლიამ.
  • ჟურნალისტები აცხადებენ, რომ არ აქვთ ილუზია, რომ სალომე ზურაბიშვილი გვარამიას შეიწყალებს, რადგან ამისთვის პრეზიდენტს ივანიშვილის ნებართვა სჭირდება.
  • თუმცა დასძენენ, რომ არ არსებობს სამართლებრივი საბაბი და არგუმენტი გვარამიას ციხეში დასარჩენად.
  • "თუ მართლა ადარდებს ანტიდასავლური პოლიტიკა, უნდა დაივიწყოს პირადი წყენები და მიიღოს უმნიშვნელოვანესი გადაწყვეტილება ნიკა გვარამიას განსათავისუფლებლად", — აცხადებენ ისინი.