ამის შესახებ რუსეთის საგარეო საქმეთა მინისტრი TASS-თან საუბრობს.

რატომ არის მნიშვნელოვანი: იმ ქვეყნის ერთ-ერთი ხელმძღვანელი პირი, სადაც ოპონენტებს ფიზიკურად უსწორდებიან და კლავენ, მათივე ტაქტიკის გამოყენებაში აშშ-ს ადანაშაულებს.

  • ეს იმის ფონზე, როცა ომის დაწყების შემდეგ დაზვერვამ არაერთხელ გაავრცელა ინფორმაცია, რომ კრემლი უკრაინის პრეზიდენტის, ვოლოდიმირ ზელენსკის ლიკვიდაციას გეგმავდა.
  • აღსანიშნია ისიც, რომ რუსეთი ხშირად ესხმის თავს აშშ-ს ბრალდებებით და ვერ ეგუება, რომ უკრაინას ფინანსურ და ჰუმანიტარულ დახმარებას უწევს.
  • მსგავსი განცხადებებით, პროპაგანდისტული მოტივით, რუსეთში ცდილობენ, გააძლიერონ "მტრის ხატი" და ხალხის მხარდაჭერა გაზარდონ.

დეტალები: ლავროვის მტკიცებით, პენტაგონიდან დაუსახელებელმა ოფიციალურმა პირებმა, ფაქტობრივად დაიმუქრეს, რომ კრემლზე "თავის მომკვეთი" დარტყმა უნდა განხორციელდეს.

  • მანვე აღნიშნა, რომ ეს მუქარა მიმართული იყო რუსეთის პრეზიდენტის, ვლადიმერ პუტინის ფიზიკური ლიკვიდაციისკენ.
  • ლავროვი იმუქრება, რომ თუ ვინმეს მართლაც უტრიალებს აზრი, რუსეთს დაემუქროს, ან პუტინის მკვლელობა გადაწყვიტოს, კარგად უნდა დაფიქრდეს სანამ რამეს გააკეთებს, რადგან ამას აუცილებლად მოჰყვება რეაგირება.
  • მან ასევე ისაუბრა დასავლეთიდან ბირთვულ სფეროში მომდინარე კონფრონტაციული სიგნალების შესახებაც.