რამდენიმე წუთის წინ უკრაინის პრეზიდენტი ვაშინგტონში ჩაფრინდა.

რატომ არის მნიშვნელოვანი: ომის დაწყების შემდეგ ვოლოდიმირ ზელენსკის ქვეყანა არ დაუტოვებია და პირველი ოფიციალური ვიზიტით ის აშშ-ს ეწვია.

  • ამერიკისა და უკრაინის პრეზიდენტების შეხვედრას საერთაშორისო მედიამ უკვე უწოდა ისტორიული მნიშვნელობის.

დეტალები: ზელენსკი აეროპორტში ოფიციალური პირები და აშშ-ში უკრაინის ელჩი დახვდნენ.

  • კადრები პრეზიდენტმა ფეისბუქგვერდზე გაავრცელა და დაწერა, რომ ვაშინგტონში ამერიკელი ხალხისთვის, კონგრესისა და ბაიდენისთვის მადლობის სათქმელად ჩავიდა.
  • "მე გავმართავ რიგ მოლაპარაკებებს უკრაინის გამძლეობისა და თავდაცვისუნარიანობის გასაძლიერებლად. კერძოდ, შეერთებული შტატების პრეზიდენტ ჯო ბაიდენთან ერთად განვიხილავ უკრაინისა და ამერიკის შეერთებული შტატების ორმხრივ თანამშრომლობას", — აღნიშნა ზელენსკიმ.

ფოტო: პრეზიდენტის ადმინისტრაცია

ფოტო: პრეზიდენტის ადმინისტრაცია

ვიზიტი თეთრ სახლში: აეროპორტიდან ზელენსკი თეთრ სახლში მივიდა, სადაც მას პრეზიდენტი და პირველი ლედი დახვდნენ.

  • შესვლის წინ პრეზიდენტებს მედიასთან კომენტარი არ გაუკეთებიათ და მხოლოდ რამდენიმე კადრი გადაიღეს.
  • ცნობილია, რომ დღესვე დაგეგმილია ზელენსკის სიტყვით გამოსვლა კონგრესში, მოგვიანებით კი ჯო ბაიდენთან ერთობლივი პრესკონფერენცია.