ეროვნული ბანკის ინფორმაციით, მონეტარული პოლიტიკის კომიტეტმა 21 დეკემბრის სხდომაზე რეფინანსირების განაკვეთი 11%-ზე შეინარჩუნა.

რატომ არის მნიშვნელოვანი: რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს.

  • როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ;
  • გაძვირებული სესხების პირობებში ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს;
  • რეფინანსირების განაკვეთი გავლენას ინფლაციაზეც ახდენს და მისი ზრდისას დაკრედიტების მოცულობა მცირდება, შემცირებული დაკრედიტება კი ინფლაციის ტემპს ანელებს.

დეტალები: მთავრობისა და ეროვნული ბანკის მოლოდინის საწინააღმდეგოდ, ორნიშნა ინფლაცია 2022 წელსაც შენარჩუნდა.

  • მონეტარული პოლიტიკა ბოლოს 31 მარტს გამკაცრდა, რა დროსაც განაკვეთი 10,5%-დან 11%-მდე გაიზარდა.
  • არსებული განაკვეთი 2008 წლის შემდეგ ყველაზე მაღალი მაჩვენებელია.
  • საზოგადოება და ბანკების ინფორმაციით, 2022 წლის 21 დეკემბრის მდგომარეობით, რეფინანსირების განაკვეთზე მიბმული 184 400 სესხია გაცემული.

რეფინანსირების განაკვეთზე მიბმულ სესხს კომერციული ბანკი თავის სარგებელსაც ამატებს.

  • თუ ბანკის სარგებელი პირობითად 5%-ა, მაშინ მსესხებლისთვის სესხი 16%-იანი (11+5) იქნება;
  • განაკვეთის 9%-მდე შემცირების შემთხვევაში სესხის მომსახურების ხარჯი 14%-მდე შემცირდება;
  • 12%-მდე ზრდის შემთხვევაში კი პირიქით 17%-მდე გაიზრდება.

ასევე, ეროვნული ბანკის გადაწყვეტილებით 15 აგვისტოდან სამომხმარებლო სესხის აღების მაქსიმალური ვადა 4-დან 3 წლამდე შემცირდა.

  • კობა გვენეტაძის თქმით, ცვლილება ძალაში ერთი წლის განმავლობაში იქნება;
  • ბანკში აცხადებენ, რომ მონეტარული პოლიტიკა გამკაცრებული დარჩება მანამ, სანამ ინფლაციურ მოლოდინებზე ზრდის მიმართულებით არსებული რისკები საკმარისად არ შერბილდება.

ფართო სურათში: ეროვნული ბანკში ამბობენ, რომ ბოლო პერიოდის გლობალურ გამოწვევად კვლავ მაღალი ინფლაცია და ინფლაციური რისკები რჩება, თუმცა 2023 წლის მეორე კვარტალიდან ინფლაციის კლებაა მოსალოდნელი.