დანაკარგებზე რუსეთის თავდაცვის მინისტრმა 6-თვიანი დუმილის შემდეგ, 21 სექტემბერს ისაუბრა, როცა პუტინმა "ნაწილობრივი მობილიზაცია" გამოაცხადა.

რატომ არის მნიშვნელოვანი: აქამდე უკრაინა ინფორმაციის ერთადერთი წყარო იყო, რომელიც რუსეთის დანაკარგებს ყოველდღიურ რეჟიმში აქვეყნებდა, რადგან ოკუპანტი ქვეყანა სიმართლეს მალავდა.

  • რუსეთის თავდაცვას არ უთქვამს ოფიციალური მონაცემები 25 მარტის შემდეგ, როდესაც განაცხადეს, რომ დაღუპულია 1 351 ჯარისკაცი და ოფიცერი.

შოიგუ ამტკიცებს, რომ "სპეცოპერაციისას" მხოლოდ 5 937 ადამიანი დაკარგეს.

  • რაც შეეხება დაჭრილებს, მინისტრს რაოდენობა არ დაუკონკრეტებია, თუმცა თქვა, რომ მათი 90% უკვე ფორმაშია და ჯარში დაბრუნდა.
  • "ჩვენ ვაგრძელებთ დასახული დავალების შესრულებას. არ არის მარტივი, ხანდახან საერთოდ არ არის მარტივი, მაგრამ ჩვენ მათ შესრულებას გავაგრძელებთ", — განაცხადა მან.

სხვა მონაცემები: შოიგუს დასახელებული რიცხვები რადიკალურად განსხვავდება იმისგან, რასაც უკრაინის შეიარაღებული ძალები ავრცელებს — მათი ბოლო განცხადებით, ლიკვიდირებულია 55 110 რუსი ჯარისკაცი.

  • ჯერ კიდევ 21 ივლისს CIA-ს დირექტორი ამბობდა, რომ უკრაინის ომში 15 000 რუსი სამხედრო დაიღუპა.
  • 2 სექტემბრის მონაცემებით, BBC-მ ღია წყაროებზე დაყრდნობით, მოახერხა უკრაინის ომში დაღუპული 6 020-ზე მეტი რუსი ჯარისკაცის იდენტიფიცირება.
  • ასევე, ომის კვლევის ინსტიტუტი და ბრიტანეთის დაზვერვა წერდა, რომ დიდი დანაკარგების გამო რუსეთი პერსონალის შევსებას ციხეებიდან პატიმრების რეკრუტირებით ცდილობდა.

რაც შეეხება უკრაინას, შოიგუ ამბობს, რომ მათი დანაკარგები გაცილებით დიდია — მისი თქმით, დაიღუპა 61 207 და დაიჭრა 49 368 უკრაინელი მებრძოლი.

  • ამ საკითხზე ბოლოს 22 აგვისტოს უკრაინის შეიარაღებული ძალების მთავარსარდალმა ისაუბრა — მისი თქმით, უკრაინას 9 000 მებრძოლი დაეღუპა.