ამის შესახებ უწყება განცხადებას ავრცელებს და აღნიშნავს, რომ გურჯაანის რაიონული სასამართლოს მიერ გამოტანილ განაჩენს არ ეთანხმებიან.

რატომ არის მნიშვნელოვანი: 2019 წლის 26 მაისს, სასკოლო ექსკურსიაზე ლაგოდეხის ნაკრძალში ნინოსხევის ჩანჩქერზე 16 წლის მოზარდი დაიღუპა — საქმის ფარგლებში ბრალი ორ მასწავლებელს ჰქონდა წარდგენილი გულგრილობის მუხლით, რამაც სიცოცხლის მოსპობა გამოიწვია.

  • გუშინ საქმეზე განაჩენი გამოცხადდა — დამნაშავედ მხოლოდ ერთი მასწავლებელი ცნეს, მეორე ბრალდებული კი გაამართლეს.

გამოძიების თანახმად, ექსკურსიაზე მოსწავლეები დირექტორის ბრძანების საფუძველზე, სკოლის მიკროავტობუსით და მასწავლებლების თანხლებით წავიდნენ და დანიშნულების ადგილზე ჩასვლისას მათთვის ცნობილი გახდა, რომ მეტეოროლოგიური პირობების გამო მდინარე ადიდდა, სწრაფი დინებით გამოირჩეოდა და ჩანჩქერზე სახიფათო მდგომარეობა იყო.

  • პედაგოგებისთვის ასევე ცნობილი იყო, რომ მოსწავლე სოფიო ნიკოლეიშვილი აპირებდა საბანაოდ ჩანჩქერში შესვლას;
  • მიუხედავად ამისა, როგორც უწყება ამბობს, ერთ-ერთი მასწავლებელი მხოლოდ სიტყვიერი გაფრთხილებით შემოიფარგლა, მეორემ კი საფრთხეზე ნაკრძალის რეინჯერის უშუალო გაფრთხილების მიუხედავად, თავად აიღო პასუხისმგებლობა გაძღოლოდა მოსწავლეთა ჯგუფს და ჩანჩქერზე აეყვანა;
  • იქ ასვლის შემდეგ, პედაგოგების მიერ გამოჩენილი გულგრილობის და წინდახედულობის ნორმების უგულებელყოფის შედეგად უმეთვალყურეოდ დარჩენილი სოფიო ნიკოლეიშვილი ჩანჩქერის სწრაფ დინებაში შევიდა და ვეღარ მოახერხა ნაპირზე დაბრუნება.