რუსეთში ამერიკის ყოფილმა ელჩმა, მაიკლ მაკფოლმა ამის შესახებ რუსეთის კვლევის ცენტრთან ისაუბრა.

რატომ არის მნიშვნელოვანი: მაკფოლი ამჟამად უკრაინის პრეზიდენტ ვოლოდიმირ ზელენსკის მიერ შექმნილი რუსეთის სანქცირების ჯგუფის კოორდინატორია.

  • 6 ივლისს მაკფოლმა თქვა, რომ იწყებდნენ მსჯელობას სხვა ქვეყნების, კერძოდ, საქართველოსა და ბელარუსის წარმომადგენლების სანქცირებაზე.

დეტალები: მაიკლ მაკფოლის თქმით, სანქციების ჯგუფი დამოუკიდებელი და არაპარტიულია, აქვს ბევრი ქვეჯგუფი და ყოველ კვირას ხვდებიან ერთმანეთს.

  • მაკფოლი ამბობს, რომ ჯგუფის წევრები არიან აშშ-დან, უკრაინიდან, გერმანიიდან, რუსეთიდანაც კი. ჯგუფის წევრები არ არიან საქართველოდან.

მაკფოლის განცხადებით, ჯგუფის წევრებიდან ზოგიერთს ჰქონდა სურვილი, ემსჯელა არა მხოლოდ რუსეთის, არამედ სხვა ქვეყნების მოქალაქეების სანქცირების რეკომენდაციის გაცემაზე.

  • მისი თქმით, ერთ-ერთი ქვეჯგუფის შეფასებით, თუ სურთ უფრო ეფექტურები იყვნენ, რუსეთს უნდა გასცდნენ და მაგალითად სანქციები დაუწესონ გერმანიის, საქართველოს მოქალაქეებს.
  • თუმცა მან იქვე აღნიშნა, რომ ეს გადაწყვეტილება არ მიუღიათ, რადგან წინააღმდეგობრივია. მაკფოლმა თქვა ისიც, რომ ეს არ ნიშნავს იმას, რომ მომავალში სხვაგვარ გადაწყვეტილებას არ მიიღებენ.
  • "ჩვენს ჯგუფში ბევრს სურს, კვლავ რუსებზე ვკონცენტრირდეთ. ამიტომ, დღეს მიზანმიმართულად გადავწყვიტეთ, არ გავაფართოოთ სანქციების შესახებ ჩვენი რეკომენდაციები რუსეთს მიღმა ცალკეულ პირებზე.".

ვინ შეიძლება დასანქცირდნენ: მაკფოლს არ დაუსახელებია კონკრეტული პირები, ვისი დასანქცირების შესახებაც, შეიძლება, გასცენ რეკომენდაცია.

  • "თუ ეხმარები პუტინის ომს პირდაპირ ან ირიბად, ამაზე პასუხი უნდა აგო".
  • მაკფოლმა თქვა ისიც, რომ შესაძლოა, პერსონალურად ჩართული არ ხარ ომში, მაგრამ, თუ მაგალითად, რუსული კომპანიის დირექტორთა საბჭოში ხარ, რომელიც ეხმარება პუტინს ომში, ამ შემთხვევაში პასუხისმგებლობას იზიარებ.
  • მან ისაუბრა გერმანიის ყოფილ კანცლერზე, გერჰარდ შრედერზე და თქვა, რომ მას სურს, "შეცვალოს თავისი აფილირება რუსეთთან ამ არგუმენტით".
  • "ეს შეიძლება იყოს ყველა პირი, კომპანია და მთავრობა, რომელიც პირდაპირ ან ირიბად კვებავს პუტინის ომს უკრაინაში. მათ პასუხი უნდა აგონ. ეს ომი ბარბაროსულია".