საქსტატმა საცხოვრებელი უძრავი ქონების ფასების ინდექსი (RPPI) გამოაქვეყნა, რომლის მიხედვითაც 2022 წლის მეორე კვარტალში, გასული წლის იმავე პერიოდთან შედარებით, უძრავ ქონებაზე ფასები 4,5%-ით არის გაზრდილი.

რატომ არის მნიშვნელოვანი: მშენებლობისა და უძრავ ქონებასთან დაკავშირებული საქმიანობების სექტორები საქართველოს ეკონომიკის მნიშვნელოვან ნაწილს წარმოადგენს.

  • საქსტატიის უძრავი ქონების ფასებს ლარში ითვლის, რაც ნიშნავს იმას, რომ ინდექსზე გავლენას ეროვნული ვალუტის გაცვლითი კურსიც ახდენს.

დეტალები: კვლევის მიხედვით, 2021 წლის მეორე კვარტალთან შედარებით ფასების ზრდა დაფიქსირდა ბინების სეგმენტში 8,2%-ით, ხოლო კერძო სახლების სეგმენტში ფასები შემცირდა 3,5%-ით.

რიცხვებში: 2022 წლის მეორე კვარტალში როგორც ახლად აშენებული ბინების, ისე კერძო სახლების სეგმენტში ყველაზე ძვირად მთაწმინდის უბანში არსებული უძრავი ქონება ფასობდა.

  • RPPI-ის დაფარვა შემოიფარგლება თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

თბილისის უბენების მიხედვით, 2022 წლის მეორე კვარტალში ბინების 1 კვ.მ-ის საშუალო (მედიანური) ღირებულება ასეთი იყო:

  • მთაწმინდა — 4 339 ლარი;
  • ვაკე — 3 845 ლარი;
  • კრწანისი — 2 937 ლარი;
  • საბურთალო — 2 927 ლარი;
  • სრული სიის ნახვა შესაძლებელია აქ.

გარდა ამისა, მიმდინარე წლის მეორე კვარტალში ახლადაშენებული საცხოვრებელი სახლი მწვანე კარკასის მდგომარეობით საშუალოდ 2 920 ლარი, თეთრი კარკასით — 2 505, ხოლო შავი კარკასით — 2 216 ლარი ღირდა.