ქართული ოცნების თავმჯდომარე ამბობს, რომ თავად არც შეკითხვების ინიციატორები არიან და კითხვებს მოსამართლეები და დეპუტატები სვავენ.

რატომ არის სმნიშვნელოვანი: აშშ-ის სახელმწიფო დეპარტამენტის პრესსპიკერმა, ნედ პრაისმა საქართველოს ხელისუფლების ბოლოდროინდელი რიტორიკა ევროინტეგრაციისთვის დამაბრკოლებლად შეაფასა.

• პრაისის თქმით, დეგნანს აშშ-ის სრული მხარდაჭერა აქვს — "დეზინფორმაცია და პერსონალური თავდასხმები არ შეესაბამება იმას, თუ როგორ ურთიერთობენ პარტნიორები ერთმანეთთან".

დეტალები: კობახიძე სწორედ პრაისის განცხადებაზე დასმული კითხვის შემდეგ შეეცადა, საზოგადოება დაერწმუნებინა, რომ არის მხოლოდ კითხვები და არა თავდასხმა კელი დეგნანზე.

• მისი თქმით, შეკითხვები ისმება ორ თემაზე — ნიკა გვარამიას მოსამართლის საკითხსა და "ომის რიტორიკისგან გამიჯვნაზე".
• "როდესაც შეკითხვები ისმება აქ შეიძლება მარტივად პასუხები გაეცეს ამ შეკითხვებზე და ამით დამთავრდებოდა ეს ყველაფერი".
• "როცა მარტივი შეკითხვები ისმის, რაზეც ელჩს შეუძლია მარტივად პასუხების გაცემა და ამით წერტილი დასმა და ეს არ კეთდება, ეს, რა თქმა უნდა, სამწუხაროდ, ეჭვებს აღრმავებს".

"მოსამართლის თემა": ნიკა გვარამიას საქმის მოსამართლე ლაშა ჩხიკვაძე აცხადებს, რომ განაჩენი გამოცხადების შემდეგ შეხვდა აშშ-ის საელჩოს თანამშრომელს, რომელმაც ჰკითხა საქმის ფაქტობრივი გარემოებები.

• დეგნანმა გარკვევით თქვა, რომ ნებისმიერი განცხადება, რომ აშშ ერეოდა სასამართლო პროცესში, არ არის სიმართლე.
• თუმცა კობახიძემ აქამდეც მოითხოვა აშშ-ის საელჩოსგან "მოსამართლეზე ზეწოლა" უარყოს ან პასუხისმგებლობა აიღოს.

"ომის რიტორიკისგან გამიჯვნა": მსგავსი შინაარსის წერილი დეგნანს ქართული ოცნებიდან წასულმა მიხეილ ყაველაშვილმა მისწერა, სადაც უსვამდა კითხვებს ომის რიტორიკასა და პროვოკაციებზე.

• დეგნანმა აქაც ცალსახად დააფიქსირა საკუთარი პოზიცია. აღნიშნა, რომ წერილი ტყუილებითა და კონსპირაციული თეორიებით იყო სავსე და ბოლომდე ვერც წაიკითხა.
• "როდესაც დეპუტატს ტყუილებში ადანაშაულებ, ეს არის ძალიან სამწუხარო", — სწორედ ასე შეაფასა კობახიძემ მაშინ დეგნანის განცხადება.

კობახიძის თქმით, უცხოელი პოლიტიკოსების კრიტიკა, "უსამართლო კრიტიკაც კი", ფასდება კრიტიკად, ხოლო მმართველი გუნდის არგუმენტირებული შეკითხვებიც კი ფასდება როგორც თავდასხმა. მისი აზრით ეს სამართლიანი არ არის.

• "არ შეიძლება, უსამართლო კრიტიკას უწოდო კრიტიკა და არ შეიძლება ამავდროულად არგუმენტირებულ შეკითხვებს დავარქვათ თავდასხმა".

უნდა ითქვას ისიც, რომ ბოლო პერიოდში, აშშ-ის ელჩი მმართველი პარტიიდან წასულების ერთ-ერთი მთავარი კრიტიკის ობიექტი გახდა.

• ყავლაშვილმა მას დიპლომატიაც კი დაუწუნა.
• ქართული ოცნებიდან წასული სამი დეპუტატის რიტორიკასა და დეგნანისა და ევროპარლამენტარების კრიტიკას რამდენიმე საკრებულოს, თერჯოლის, ჭიათურის, ახალციხის, გორის, თელავის, ლაგოდეხის, ადიგენისა და ასპინძის წევრებიც შეუერთდნენ.