თბილისის მერი და ქართული ოცნების გენერალური მდივანი, კახა კალაძე ფიქრობს, რომ სოსო გოგაშვილის მიერ NGO-ებისთვის გადაცემული დოკუმენტები სისულელეა.

რატომ არის მნიშვნელოვანი: გავრცელებული ფაილების ავთენტურობა დადასტურებული არ არის, თუმცა გოგაშვილი სუს-ის ყოფილი უფროსია და არაერთხელ უთქვამს, რომ ჰყავს წყაროები და აქვს წვდომა კონკრეტულ ინფორმაციაზე.

• აღსანიშნია, რომ გოგაშვილი 16 ივლისს სპეცოპერაციით დააკავეს — მანამდე, 15 ივლისს კი პოსტი გამოაქვეყნა, სადაც თვითმმართველობის არჩევნების დროს გაყალბების მტკიცებულებებზე ისაუბრა.
• დაკავების შემდეგ მისმა ადვოკატმა განაცხადა, რომ ეს დოკუმენტები ყველა შესაბამის ორგანიზაციას, მათ შორის, დიპლომატიურ კორპუსსა და მედიას გადასცეს და გასაჯაროვდებოდა.
• ფაილები NGO-ებმა დღეს გამოაქვეყნეს — ის შეიცავს ჩანაწერებს რომლებშიც ჩანს, რომ, სავარაუდოდ, სახელმწიფო უწყებები აგროვებდნენ პირად ინფორმაციას საჯარო სექტორში დასაქმებულებზე, სამომავლოდ მათზე ზეწოლის მიზნით.

კალაძემ ამ ფაილებზე საუბრისას ისრების გადატანა სცადა და განაცხადა, რომ არჩევნების გაყალბებაზე თუ უნდა დაიწყოს გამოძიება და თუ რაიმე კითვის ნიშანი არსებობს, ეს არის ISFED-ის პარალელური დათვლები.

• კითხვაზე, დოკუმენტები ყალბია თუ ნამდვილი, მან ჟურნალისტებს ასე უპასუხა:
• "ეს არის სისულელე, ძალიან დიდი სისულელე, დაგაკმაყოფილათ პასუხმა? ეს არის ჩემი შეფასება, მე არ ვამტკიცებ. რას ნიშნავს ოფიციალური დოკუმენტები? ეს არის ჩემი შეფასება, ამიტომ, თუ თქვენ გაქვთ სხვა შეფასება ამასთან დაკავშირებით, თქვენი მოსაზრებაა".

დეტალები: დოკუმენტებში საჯარო სკოლების დირექტორების, საგანმანათლებლო რესურს-ცენტრების ხელმძღვანელების და სხვადასხვა საბიუჯეტო ორგანიზაციის თანამშრომლების პოლიტიკური დახასიათებები და რეკომენდაციები იყო.

• გარდა ამისა, ფაილებში ჩანს პირობითი მსჯავრის ქვეშ მყოფი პირების, პატიმრებისა და ე.წ. ქუჩის ბიჭების ხმების მობილიზებისთვის გამოყენების მცდელობებიც.
• დოკუმენტებიდან გამოიკვეთა, რომ, სავარაუდოდ, მმართველ პარტიასთან ერთად ამ სისტემის შემსრულებლები, მათ შორის, სავარაუდოდ, მაშინდელი იუსტიციის მინისტრის მოადგილე გიორგი პატარიძე და შსს-ს გენერალური ინსპექციის უფროსი ალექსანდრე ხოჯევანიშვილი იყვნენ.

NGO-ების განხადებით, მმართველი პარტია, მაღალი ალბათობით, არასაჯარო წყაროებიდანაც აგროვებდა ინფორმაციას ოპოზიციური პარტიების მხარდამჭერების შესახებ და ინტერესდებოდა, თუ რა სახის ზემოქმედება, შეიძლება, მოეხდინა მათზე.

• ამის მაგალითს მარნეულის საკრებულოს მაშინდელი თავმჯდომარის მოადგილის, მამუკა ნავერიანის სახელით 2018 წელს გაგზავნილი წერილები წარმოადგენს, რომლის სქრინებიც გოგაშვილმა მათ მიაწოდა. .

მათივე შეფასებით, კვლევის საფუძველზე გამოიკვეთა მმართველი პარტიის სასარგებლოდ არაკანონიერი გზებით ამომრჩევლის ხმების მობილიზების მასშტაბური სქემა, რომლითაც, მაღალი ალბათობით, დასტურდება სახელმწიფო უწყებების საარჩევნო/პარტიული მიზნით გამოყენება.

• ორგანიზაციები პრობაციის ეროვნული სააგენტოდან გამოთხოვილი ინფორმაციის საფუძველზე აცხადებენ, რომ 2018 წლის არჩევნების პერიოდში იმ პირთა რაოდენობა, ვისაც პირობითი მსჯავრი გაუუქმეს და მართვის ჩამორთმეული უფლება აღუდგინეს, გაიზარდა.