ქართული ოცნების დეპუტატი უარყოფს, რომ დაპირისპირებაში თავადაც მონაწილეობდა და ამბობს, რომ გამშველებელი იყო.

რატომ არის მნიშვნელოვანი: ვატო წერეთელს დეპუტატი ანრი ოხანაშვილი თავს დაესხა.

  • TV პირველის საინფორმაციო სამსახურის ხელმძღვანელი Facebook-ზე წერს, რომ ანრი ოხანაშვილთან ერთად ფიზიკურ ანგარიშსწორებაში მონაწილეობდნენ დეპუტატი ლევან მგალობლიშვილი და ირაკლი ზარქუა.

ზარქუა წერს, რომ ამერიკის საელჩოს ღონისძიებაზე, წერეთელი "მიეჭრა ანრის და შეურაცხმყოფელი სიტყვებით მიმართა", რომლის დაწერაც "ეუხერხულება".

  • "სეთ საქციელს და ამ შეურაცხყოფის მოტივის და მიზეზის დადგენის მცდელობას, მოყვა გარკვეული შელაპარაკება და დაპირისპირება მათ შორის".
  • ამტკიცებს, რომ დაპირისპირება, მხოლოდ ოხანაშვილსა და წერეთელს შორის იყო, დანარჩენები კი აშველებდნენ.
  • "ცუდია რაც მოხდა და მიუღებელია, მაგრამ როდესაც შეურაცხყოფას მიაყენებ სხვას, იმისთვისაც მზად უნდა იყო რომ პასუხს მიიღებ იმ კაცისგან!"
  • "კიდევ ერთხელ ვამბობ, რა თქმა უნდა დასაგმობია რაც მოხდა და მიუღებელი! თუმცა უნდა ითქვას, რომ ეს იყო წინასწარ დაგეგმილი პროვოკაცია ანრის წინააღმდეგ!"

დეტალები: შემთხვევა აშშ-ს საელჩოში, ამერიკის დამოუკიდებლობის დღისადმი მიძღვნილ ღონისძიებაზე მოხდა. წერეთელი საელჩოსგან კადრების გასაჯაროებას ითხოვს.

  • მელაძე საუბრობს, რომ გაშველებისას დაზიანდა TV პირველის აღმასრულებელი დირექტორი ნანა აბურჯანიძე.

ოხანაშვილი ამტკიცებს, თითქოს წერეთელმა "უბინძურესი პროვოკაცია მოაწყო".

  • არ აკონკრეტებს რა პროვოკაციაზეა საუბარი, თუმცა აცხადებს, რომ "ამას ვერც ერთი ქართველი ვერ მოითმენდა".
  • თავდასხმის პროვოკაციით გამართლებას ცდილობს მიხეილ სარჯველაძეც.

აშშ-ის საელჩო სწავლობს ინფორმაციას მათ ტერიტორიაზე მომხდარი დაპირისპირების შესახებ.

  • მათი განცხადებით, ცნობილია ინფორმაცია დამოუკიდებლობის დღისადმი მიძღვნილი ღონისძიებისას საელჩოს ტერიტორიაზე დაპირისპირების შესახებ.

ქარტია ვატო წერეთელზე თავდასხმას გმობს.

  • ქართული ოცნების დეპუტატებს მოუწოდებს, აიღონ პოლიტიკური პასუხისმგებლობა.