ინფორმაციის თავისუფლების განვითარების ინსტიტუტი ამბობს, რომ აქციის #შინევროპისკენ ორგანიზატორებისა და მხარდამჭერების მიმართ თავდასხმები აშკარად ატარებს კოორდინირებულ ხასიათს.

რატომ არის მნიშვნელოვანი: დღეს სტუდენტებს, რომლებიც აქციის ფლაერებს არიგებდნენ, ფიზიკურად დაუპირისპირდნენ.

  • სტუდენტები ამბობენ, რომ თავდამსხმელები ქართული ოცნების მხარდამჭერები არიან.

დეტალები: IDFI შსს-ს მოუწოდებს, უზრუნველყოს 3 ივლისის აქციის ორგანიზატორებისა და მხარდამჭერთა საზოგადოებრივი კამპანიების მშვიდობიანი წარმართვა.

  • "სამინისტრომ უნდა განახორციელოს, კანონით გათვალისწინებული პრევენციული და შემდგომი რეაგირების ღონისძიებები რათა არ დაუშვას 3 ივლისის აქციის ფონის დამძიმება და ძალადობის წახალისება";
  • "მოვუწოდებთ სპეციალურ საგამოძიებო სამსახურს დაუყოვნებლივ დაიწყოს გამოძიება სისხლის სამართლის კოდექსის 153-ე მუხლით გათვალისწინებულ დანაშაულზე".

თავდასხმები დაგმო საქართველოს ახალგაზრდა იურისტთა ასოციაციამაც. საიამ სამართალდამცავ ორგანოებს მოუწოდა, გაატარონ პრევენციული ღონისძიებები მსგავსი ფაქტების აღსაკვეთად და გამოიძიონ თავდასხმის შემთხვევები.

  • "ასევე, მოვუწოდებთ ქართულ ოცნებას, შეწყვიტოს მისი მხარდამჭერების მობილიზება, რომელიც ემსახურება მოძრაობა შინ ევროპისკენ წარმომადგენლების კონსტიტუციური უფლების შელახვას".

შსს-მ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

არქივიდან: 24 ივნისს აქციაზე #შინევროპისკენ პრემიერმინისტრის, ირაკლი ღარიბაშვილის გადადგომა მოითხოვეს.

  • მონაწილეების მიერ მთავრობისთვის დაწესებული ერთკვირიანი ვადა კვირას, 3 ივლისს გადის;
  • პირობების შეუსრულებლობის შემთხვევაში, მოქალაქეები პარლამენტის წინ შეიკრიბებიან და მათ შესრულებამდე არ დაიშლებიან.