სპეციალური საგამოძიებო სამსახურის განცხადებით, ორივე პირს ბრალი 156-ე მუხლის მე-2 ნაწილით გათვალისწინებული დანაშაულის ჩადენისთვის წარედგინათ, რაც გულისხმობს ადამიანის დევნას, მის პროფესიულ საქმიანობასთან დაკავშირებით.

რატომ არის მნიშვნელოვანი: ბოლო წლებში ჟურნალისტურ საქმიანობაში ხელშეშლისა და ფიზიკური ძალადობის არაერთი შემთხვევა დაფიქსირდა.

  • არასამთავრობო და მედიის საკითხებზე მომუშავე ორგანიზაციები ხშირად საუბრობენ იმაზე, რომ ხელისუფლების რიტორიკა მედიაზე ძალადობას ახალისებს.
  • სპეციალურმა საგამოძიებო სამსახურმა გამოძიება თავდაპირველად სისხლის სამართლის კოდექსის 154-ე მუხლით დაიწყო, რაც ჟურნალისტურ საქმიანობაში უკანონოდ ხელის შეშლას გულისხმობს.

დეტალები: შემთხვევა 19 აპრილს მოხდა. მედიის განცხადებით, აგრესიულად განწყობილი მოქალაქეები ყვიროდნენ, რომ არ მოსწონთ TV პირველის სარედაქციო პოლიტიკა.

  • საგამოძიებო სამსახურის განცხადებით, მისი საქმიანობის გამო ბრალდებულები ოპერატორთან მივიდნენ და სიტყვიერი შეურაცხყოფა მიაყენეს.

  • შელაპარაკების შემდეგ კი, ბრალდებულებმა ოპერატორს ფიზიკური შეურაცხყოფა მიაყენეს და შემთხვევის ადგილიდან მიიმალნენ.

ფაქტს გამოეხმაურა ჟურნალისტური ეთიკის ქარტია და მედიის ადვოკატირების კოალიცია.