თბილისის მერიის ზედამხედველობის საქალაქო სამსახურის წარმომადგენლებმა, გვიან ღამით, სამგორში, ნავთლუღის ბაზრის მიმდებარედ განთავსებული გარევაჭრობისთვის განკუთვნილი კონსტრუქციები გაიტანეს. აღნიშნული ტერიტორია ,,თბილსერვის ჯგუფმა“ წყლის ჭავლით მორეცხა. ფოტომასალას აღნიშნული ფაქტის შესახებ, თბილისის მერიის პრესსამსახური ავრცელებს.

როგორც მერია აცხადებს, ზედამხედველობის საქალაქო სამსახურის წარმომადგენლებმა მოვაჭრეები რამდენჯერმე გააფრთხილეს, შეეწყვიტათ გარევაჭრობა.

თბილისის მერის მოადგილის, გიგა ნიკოლეიშვილის განცხადებით, ტერიტორიის გასუფთავების შემდეგ, თბილისის მერიის კეთილმოწყობის საქალაქო სამსახური საგზაო ინფრასტრუქტურის სარეაბილიტაციო სამუშაოებს დაიწყებ:

,,უნებართვო გარევაჭრობის აღსაკვეთად ღონისძიებები გრძელდება. ამჯერად გარევაჭრობისთვის განკუთვნილი უნებართვო კონსტრუქციებისგან ნავთლუღის ბაზრის მიმდებარე ტერიტორია გათავისუფლდა. უახლოეს პერიოდში კეთილმოწყობის საქალაქო სამსახური აქ გზისა და ტროტუარის სარეაბილიტაციო სამუშაოებს განახორციელებს".

თბილისის მერიამ უნებართვო გარევაჭრობის წინააღმდეგ ბრძოლა მიმდინარე წლის მარტიდან დაიწყო, თავდაპირველად ტერიტორიიდან გაიყვანეს მეტრო "მარჯანიშვილის" მიმდებარედ მომუშავე ადამიანები. გარევაჭრობა ასევე აიკრძალა მეტრო ახმეტელის თეატრის, დინამოსა და ვაგლზის მოედნის ტერიტორიაზე. მერია ამბობს, რომ გარემოვაჭრეებს სამუშაო ადგილებს მიმდებარე ბაზრობებზე გამოუყოფენ.