რუსეთის ამბობს, რომ აზოვსტალი აიღეს. მათივე მტკიცებით, ბოლო ჯგუფი, რომელიც ქარხანაში იყო დარჩენილი, 531 მებრძოლი, დღეს ჩაბარდათ. ამ ეტაპზე უკრაინულ მხარეს ინფორმაცია არ გაუვრცელებია.

რუსული სახელისუფლებო მედიის ინფორმაციით, თავდაცვის მინისტრმა, სერგეი შოიგუმ პრეზიდენტს მოახსენა, რომ "მარიუპოლი გაათავისუფლეს". მათივე მტკიცებით, აზოვის პოლკის მეთაური ტერიტორიიდან ბრონირებული მანქანით გაიყვანეს. ამის მიზეზად კი პროპაგანდისტული მოტივებით "მარიუპოლის მაცხოვრებლების სიძულვილს" ასახელებენ და ამტკიცებენ, თითქოს ქალაქში სამხედრო დანაშაულები მან ჩაიდინა.

რუსეთი ამბობს, რომ ახლა სრულად აკონტროლებს აზოვსტალის საცავებს, სადაც მებრძოლები იმალებოდნენ. მათივე მტკიცებით, საერთო ჯამში, 2 439 მებრძოლი ჩაბარდათ.

გარდა ამისა, კრემლისტურმა რიამ გაავრცელა ვიდეოები, რომელშიც საზღვაო ქვეითების 36-ე ბრიგადის ხელმძღვანელი ჩანს. უცნობია, როდისაა გადაღებული ვიდეო, თუმცა ის ამბობს, რომ საომარი მოქმედებების შედეგად აღმოჩნდა აზოვსტალში, რის შემდეგაც ტყვედ აიყვანეს.

ამ ინფორმაციის გავრცელებამდე, უკრაინის პრეზიდენტმა, ვოლოდიმირ ზელენსკიმ განაცხადა, რომ აზოვსტალიდან ევაკუირებულია ყველა მშვიდობიანი მოქალაქე, ექიმი და დაჭრილი. მისივე თქმით, მალევე ტერიტორიიდან ყველას გამოიყვანდნენ.

როგორც ზელენსკიმ აღნიშნა, ამ თემაზე მოლაპარაკების სტრუქტურა რთულია და შეთანხმებული იყვნენ იმაზე, რომ დებლოკირებაში მონაწილეობას მიიღებდნენ დასავლელი პარტნიორები.

პრეზიდენტის თქმით, აზოვსტალის მებრძოლებს მისცეს სრული უფლება გამოსულიყვნენ და გადაერჩინათ სიცოცხლე.