დიდი ბრიტანეთისა და შვედეთის პრემიერმინისტრებმა ხელი მოაწერეს დეკლარაციას, რომლის მიხედვითაც თავდასხმის შემთხვევაში ისინი ერთმანეთს დაეხმარებიან. ლიდერებმა განაცხადეს, რომ უსაფრთხოების ორმხრივი შეთანხმება შესაძლოა ასევე გულისხმობდეს დაზვერვის გაზიარებას და ერთობლივ სამხედრო წვრთნებს.

პრემიერმინისტრების თქმით, თანამშრომლობა კიდევ უფრო მნიშვნელოვანი იყო უკრაინაში მიმდინარე ომის გათვალისწინებით.

დოკუმენტში ვკითხულობთ, რომ დიდი ბრიტანეთი და შვედეთი იზიარებენ საერთო ღირებულებებს და ესმით უსაფრთხოების გამოწვევები როგორხ ევროპაში, ისე გლობალურ დონეზე. შეთანხმების მიხედვით, ორივე ქვეყანა მზად არის ერთად იმუშაოს ამ გამოწვევების გადასაჭრელად და გააძლიეროს თავდაცვისა და უსაფრთხოების თანამშრომლობა და სოლიდარობა ევროპაში.

ბორის ჯონსონმა პრესკონფერენციაზე აღნიშნა ისიც, რომ იმ შემთხვევაში თუ შვედეთი NATO-ში გაწევრიანებას გადაწყვეტს, ის მხარს დაუჭერს.