2022 წლის მეთ გალა უკვე დასრულდა, თუმცა მის განხილვა — არა. წლევანდელი ღონისძიების თემა "მოდის ანთოლოგია ამერიკაში: 'მოოქრული ხანის' ბრწყინვალება" იყო. მეთ გალაზე, როგორც ყოველთვის, საზოგადოების ყურადღება კიმ კარდაშიანმა მიიპყრო.

კიმს წელს მერილინ მონროს 1962 წლის კაბა ეცვა, რომლითაც მერილინმა პრეზიდენტ კენედის Happy Birthday, Mr. President უმღერა. კაბა ჟან ლუის შექმნილია, 2 500 ძვირფასი თვალი ხელით აქვს მიკერებული და მუზეუმში ინახებოდა. ის პირდაპირ მერილინის ტანისთვის შექმნეს, ამიტომ მოსინჯვისას კიმი დაბრკოლების წინაშე აღმოჩნდა — კაბა პატარა ჰქონდა.

კიმმა მეთ გალაზე განაცხადა, რომ კაბაში ჩასატევად 3 კვირა მკაცრ დიეტაზე იყო — მან რაციონიდან შაქარი და ნახშირწყლები ამოიღო, სარბენ ბილიკზე ვარჯიშობდა და ე.წ. საუნის კოსტიუმი ეცვა. საბოლოოდ მან 3 კვირაში 7 კგ-ზე მეტი დაიკლო და კაბის მორგებაც შეძლო.

სოციალურ ქსლებეში წონის კლების მსურველი ადამიანები დაინტერესდნენ, თუ კონკრეტულად როგორ იკვებებოდა კიმი დიეტის დროს. მკაცრ დიეტის პოპულარიზებისთვის კიმ კარდაშიანი ინტერნეტში საზოგადოებამ, მათ შორის, დიეტოლოგებმა და ექსპერტებმა გააკრიტიკეს.

"კიმ კარდაშიანის მიერ იმის თქმა, რომ 3 კვირაში 7 კილო დაიკლო მეთ გალას კაბაში ჩასატევად და ამის უდიდეს მიღწევად წარმოჩენა უბრალოდ სიგიჟე კი არა, პრობლემურია"

"რატომ ვუკრავთ კიმ კარდაშიანს ტაშს შიმშილისთვის, რათა იმ კაბაში ჩატეულიყო, რომლის ჩაცმის უფლება არც უნდა ჰქონოდა?

"ეს უნდა ვთქვა და აზრს ვერავინ შემაცვლევინებს: შევე*ი კიმ კარდაშიანს, რადგან გადაწყვიტა, რომ ისტორიული კაბა უნდა ჩაეცვა, შემდეგ კი ამის მისაღწევად არაჯანსაღი წონის კლების პოპულარიზება უნდა მოეხდინა. უამრავი არაჯანსაღი სილამაზის სტანდარტის დამკვიდრება სწორედ კარდაშიანების ბრალია"

კიმ კარდაშიანის წონის კლებაზე კომენტარი სფეროს ექსპერტებმაც გააკეთეს. მათი თქმით, სწრაფი წონის კლება რაციონიდან შაქრისა და ნახშირწყლების ამოღების შემდეგ ორგანიზმიდან წყლის გამოდევნით აიხსნება. ამ დანაკარგს კი მალევე ვინაზღაურებთ, რადგან შაქარსა და ნახშირწყლებს ოდესღაც ისევ მივიღებთ — ეს ნივთიერებები ხომ ჩვენი ენერგიის წყაროა.

ექსპერტებმა ისიც აღნიშნეს, რომ წონის კლება თანდათანობით უნდა მოხდეს, აგრეთვე საყვარელი საჭმლის რაციონიდან მთლიანად ამოღებაც არაა მიზანშეწონილი — ეს, შესაძლოა, კვებითი აშლილობის გამომწვევ მიზეზადაც იქცეს. ექსპერტები იმაზეც შეთანხმდნენ, რომ კიმ კარდაშიანის მიერ წონის კლებაზე სიამაყით საუბარი კვებითი აშლილობისკენ მიმართული ადამიანებისთვის განსაკუთრებულად საშიშია.

რა თქმა უნდა, წონის კლების სურვილში ცუდი არაფერია, თუმცა აუცილებელია გვახსოვდეს, რომ ტანსაცმელი ჩვენ უნდა გვერგებოდეს და არა ჩვენ — ტანსაცმელს. ამასთან, სხეულის ფორმების ცვლილება და წონის კლება ინდივიდუალური პროცესია და უამრავ ფაქტორზეა დამოკიდებული, თუმცა შიმშილი ნებისმიერ შემთხვევაში მიუღებელი და საშიშია.

ამავე თემაზე:

მეთ გალა 2022 — ნახეთ 10 საუკეთესოდ ჩაცმული ვარსკვლავი