მედიაგიგანტებმა Sky-მ და HBO-მ ახალი, $250 მილიონიანი, კონტრაქტი გააფორმეს, რომლის მიხედვითაც ისინი ერთობლივად უმაღლესი დონის დრამატულ სერიალს გადაიღებენ.

კომპანიების აზრით, პროდუქტი რომელსაც ისინი შექმნიან, უპრეცენდენტო და ყველაზე მაღალი დონის იქნება, რომელიც მთელი მსოფლიოს მასშტაბით გაიყიდება.

"ეს არის ჩვენი და HBO-ს ურთიერთობის ახალი ეტაპი", ამბობს Sky-ს აღმასრულებელი პროდიუსერი ჯერემი დერიქი.

როგორც დერიქი ამბობს, ახალი პარტნიორობის საფუძველზე ისინი წელიწადში ორ დრამატულ სერიალს შექმნიან, რამდენიმე იდეაზე მოლაპარაკება უკვე მიმდინარეობს და მათ მაყურებელი 2018 წელს იხილავს.

Sky-ს ასევე ევალება HBO ევროპულ ბაზარზე უფრო ხელმისაწვდომი გახადოს და მისი ყველა პროექტი დიდი ბრიტანეთის, ირლანდიის, გერმანიის, ავსტრიისა და იტალიის ტერიტორიაზე გაავრცელოს.

"Sky ჩვენი დიდი ხნის პარტნიორია და ეს გარიგება საშუალებას გვაძლევს უფრო გავაღრმავოთ თანამშრომლობა ორ მსხვილ კომპანიას შორის, რომლებსაც მაღალი დონის პროდუქტის შექმნის დიდხნიანი ტრადიცია აქვთ", - ამბობს HBO-ს აღმასრულებელი პროდიუსერი რიჩარდ პლეპერი.