პროკურატურის განცხადებით, ქოლ-ცენტრების საქმეზე ტრანსნაციონალური დანაშაულებრივი ჯგუფის 6 წევრი დააკავეს. უწყების ინფორმაციით, დაკავებულები გერმანიის მოქალაქეების კუთვნილ დიდი ოდენობის თანხებს თაღლითურად დაეუფლნენ.

"დანაშაულებრივი გეგმის შესაბამისად, ორგანიზებული ჯგუფის წევრებმა საქართველოში დააფუძნეს ექვსი შეზღუდული პასუხისმგებლობის საზოგადოება, რომელთა ბაზაზე მოაწყვეს ე.წ. ქოლ-ცენტრი. ოპერატორებად უცხო ენის მცოდნე პირების დასაქმებით, დანაშაულებრივი ჯგუფის სამიზნეს ევროპის სხვადასხვა ქვეყანაში მცხოვრები მოქალაქეები წარმოადგენდნენ.

დანაშაულებრივი გზით დაუფლებული ფულადი თანხები, საბანკო ტრანზაქციების მეშვეობით თავსდებოდა ორგანიზებული ჯგუფის მიერ უცხოეთში დაფუძნებული კომპანიების ანგარიშებზე, საიდანაც ფიქტიური დანიშნულებით, თითქოსდა გაწეული მომსახურების სანაცვლოდ, ირიცხებოდა საქართველოში, მათივე კომპანიების ანგარიშებზე", — აცხადებენ უწყებაში.

პროკურატურაში, ასევე, აღნიშნავენ იმასაც, რომ ამავე ფაქტზე წინა წლის ოქტომბერში პროკურატურამ სისხლისამართლებრივი დევნა ტრანსნაციონალური ორგანიზებული ჯგუფის შვიდი წევრის მიმართ დაიწყო. მათივე ცნობით, დაჯგუფების წევრები თაღლითობისა და უკანონო შემოსავლის ლეგალიზებისთვის, სისხლის სამართლის კოდექსის 180-ე და 194 მუხლით დააკავეს, რაც 9-დან 12 წლამდე თავისუფლების აღკვეთას ითვალისწინებს.

"საქართველოს პროკურატურა, გერმანულ მხარესთან თანამშრომლობით, ინტენსიურ რეჟიმში აგრძელებს ტრანსნაციონალური დანაშაულის ფაქტებზე გამოძიებას, სხვა პირების იდენტიფიცირების და მხილების მიზნით", — ნათქვამია განცხადებაში.