იაპონელ მეხანძრეს მოთამაშის კარიერის შეწყვეტა მას შემდეგ მოუწია, რაც ქალაქ ვაკაიამას ოფიციალურმა პირებმა მისი YouTube-ის არხი აღმოაჩინეს.

იაპონიის ადგილობრივი საჯარო სამსახურის აქტის მიხედვით, საჯარო სფეროში დასაქმებულ ადამიანებს სხვა ანაზღაურებადი სამუშაოს შესრულება ეკრძალებათ, მათ შორის თამაშებთან დაკავშირებული შემოსავლიანი ვიდეოების შექმნაც. მეხანძრე კი YouTube-დან მიღებული სარეკლამო შემოსავლის გამო ამ კანონს არღვევდა.

33 წლის კაცმა, რომელიც დასავლეთ იაპონიის ქალაქ ვაკაიამას სახანძრო განყოფილებაში მუშაობს, 2020 წელს YouTube-ზე სტრატეგიული თამაშების პირველი ვიდეო ატვირთა. 2021 წლის ოქტომბერში მას უკვე 15 ათასი გამომწერი ჰყავდა და რეკლამების მეშვეობით, დაახლოებით, 10 ათასი დოლარი დააგროვა.

იმავე თვეში ქალაქ ვაკაიამას ოფიციალურმა პირებმა ანონიმური წყაროსგან ინფორმაცია მიიღეს, რომ ერთ-ერთ მეხანძრეს YouTube-ის არხი ჰქონდა. იმის გამო, რომ კაცი ვიდეოებში არ ჩანდა, გამომძიებლებს 314 ვიდეოს შესწავლა მოუწიათ, რათა ის ხმის მეშვეობით ამოეცნოთ.

მას შემდეგ, რაც კაცმა სათამაშო საქმიანობა აღიარა, იანვრის ხელფასი 10%-ით შეუმცირეს. "ცუდი არ არის, რომ ის იუთუბერია, მაგრამ, ფაქტია, რომ მეხანძრე რეკლამებიდან შემოსავალს იღებდა. ასე რომ, მან ვაკაიამაში მცხოვრებ ადამიანთა ნდობას უღალატა", — ამბობს ქალაქის ოფიციალური წარმომადგენელი.

მეხანძრის თქმით, ვერ აცნობიერებდა, რომ ჰობის გამო კანონს არღვევდა. "წარმოდგენა არ მქონდა, თუ თამაშებთან დაკავშირებული ვიდეოები მეორე სამსახურად ითვლებოდა", — დასძინა მან.