რამდენიმე წუთის წინ ცნობილი გახდა, რომ ნანა ექთიმიშვილისა და სიმონ გროსის ახალი ფილმი "ჩემი ბედნიერი ოჯახი" იტალიაში, ლეჩეს ევროპული კინოს ფესტივალის გამარჯვებულია. ფილმს ფესტივალის მთავარი ჯილდო, "ოქროს ზეთისხილის ხე", საუკეთესო ფილმისათვის, გადაეცა.

ფილმს ასევე გადაეცა ორი სხვა ჯილდოც: პრიზი საუკეთესო საოპერატორო ნამუშევრისთვის და კინოკრიტიკოსთა საერთაშორისო გაერთიანების, FIPRESCI-ს პრიზი.

ფესტივალის დახურვას ესწრებოდა მთავარი როლის შემსრულებელი, მსახიობი ია შუღლიაშვილი და ფრანგი კოპროდიუსერი გიომ დე სეი.

შეგახსენებთ, რომ The New York Times-მა ნანა ექვთიმიშვილი და სიმონ გროსი იმ ცხრა ახალ რეჟისორს შორის დაასახელა, რომელთა ფილმებსაც აუცილებლად უნდა უყუროთ.

კინოკრიტიკის რუბრიკის მთავარი რედაქტორი, მანოლა დარგისი წერდა, რომ ჩემი ბედნიერი ოჯახი ქალის გათავისუფლების ისტორიაა.

"მთავარი გმირი, მანანა (მშვენიერი, მომხიბვლელი ია შუღლიაშვილი) ცოლი, დედა, შვილი და დიასახლისია. ამ სტანდარტული როლებიდან მას არც ერთი არ ანიჭებს ბედნიერებას. ეს არის სარკასტული და ემოციური ისტორია ქალის გათავისუფლების შესახებ. მოვლენების ცენტრში არის ქალი, რომელიც კარს იჯახუნებს და ამით მთელ ოჯახს შოკირებულს ტოვებს. მას უნდა, რომ უკან მოიტოვოს კლაუსტროფობიული სივრცე და მასში მცხოვრები პრეტენზიული ადამიანები. ოჯახი ცდილობს, მანანა შეზღუდოს, ის კი თავისუფლებისთვის იბრძვის. ნანა ექვთიმიშვილსა და სიმონ გროსს შეეძლოთ გენიალური ქორეოგრაფები გამხდარიყვნენ, მაგრამ გაგვიმართლა, რომ მათ რეჟისორობა გადაწყვიტეს", - ასე ახასიათებს კინოფილმს მანოლა დარგისი.

ნანა ექვთიმიშვილისა და სიმონ გროსის ფილმის გლობალური დისტრიბუციის უფლება ცოტა ხნის წინ ნეტფლიქსმა იყიდა, ხოლო სანდენსის კინოფესტივალზე ის წლის აღმოჩენად დაასახელეს.

რეჟისორებს ნანა ექვთიმიშვილსა და სიმონ გროსს კი ცოტა ხნის წინ, სოფიას საერთაშორისო კინოფესტივალზე საუკეთესო რეჟისურისათვის პრიზი გადაეცათ.

ფილმის პრემიერა უკვე შედგა ამერიკის შეერთებულ შტატებსა და ბერლინში, წლის ბოლომდე კი მას ქართველი მაყურებელიც იხილავს.