ექსპრეზიდენტ მიხეილ სააკაშვილის დედა გიული ალასანია გორის სამხედრო ჰოსპიტალში შვილთან შეხვედრის შემდეგ აცხადებს, რომ მიხეილ სააკაშვილი სუსტადაა და ხანგრძლივი რეაბილიტაცია ესაჭიროება.

"ნამდვილად არ არის კარგად, ღონე არ აქვს ადამიანს აშკარად. ასეთი ჩემი შვილი მე არ მახსოვს, სულ მოძრაობაში იყო და რა გააჩერებდა და ახლა სულ ლოგინისკენ უჭირავს თვალი. გადაყვანა თუ იქნება უნდა იყოს სადმე ნორმალურ კლინიკაში, ნამდვილად სჭირდება ადამიანს რეაბილიტაცია", — განაცხადა ალასანიამ.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.

4 დეკემბერს მარიამ ჯიშკარიანმა განაცხადა, რომ სააკაშვილი ფსიქოტროპულ მედიკამენტებს იღებდა. ჯიშკარიანის განცხადებით, მიხეილ სააკაშვილის სამედიცინო ბარათიდან არ ირკვევა, რატომ იღებდა ექსპრეზიდენტი ნეიროლეპტიკურ პრეპარატს. მისი თქმით, სააკაშვილმა იცოდა, რომ საძილე მედიკამენტს იღებდა.