KHIDI-ს დამფუძნებელი, თამუნა აქსანდერი აცხადებს, რომ დღეს შრომის ინსპექციამ კლუბი მისი ინფორმირების გარეშე დალუქა. როგორც ის ამბობს, კლუბის დალუქვის შემდეგ, პოსტფაქტუმ დაურეკეს. ამის შესახებ მან საკუთარ Facebook-ზე დაწერა.

"გუშინ ხალხის და ჟურნალისტების გამო შრომითი ინსპექცია წავიდა, დღეს მისულან და პოსტფაქტუმ დამირეკეს, დაგილუქეთო, ყველანაირი მომსწრის გარეშე, უკანონოდ დაგვილუქეს. შეკითხავზე, რატომ არ დამირეკეს, მითხრეს, რომ მირეკავდნენ. შემიძლია დავდო სქრინი 11:35-ზე დარეკეს, ზარი ვერ გავიგე და 11:39-ზე გადავურეკე და დალუქულიაო. ვიღაცას ინტერესები აქვს ხიდი-ს განადგურების ან ხელში ჩაგდების. ვერ მოგართმევთ ნამდვილად", — წერს ის.

გუშინ, 5 დეკემბერს შრომის ინსპექციამ კლუბი KHIDI 10 000 ლარით დააჯარიმა და დალუქა. მიზეზად ადგილზე "აკრძალული მასობრივი ღონისძიების ფაქტის გამოვლენა" დაასახელეს. მათი განცხადებით, კლუბის ხელმძღვანელობამ მხედველობაში არ მიიღო ის, რომ საქართველოს მთავრობის N322 დადგენილების შესაბამისად, მასობრივი გასართობი თუ სოციალური ღონისძიებების განხორციელება კვლავ აკრძალვად რჩება.

ამის საპასუხოდ, კლუბმა განაცხადა, რომ ესკალაციის თავიდან აცილების მიზნით, კლუბს დატოვებდნენ, თუმცა პასუხისმგებელ პირებს მათი მუშაობის დაშვებისთვის გონივრულ ვადას აძლევდნენ. როგორც კლუბის მიერ გავრცელებულ განცხადებაშია აღნიშნული, წინააღმდეგ შემთხვევაში "მხოლოდ წინააღმდეგობას მიიღებენ".

მათი თქმით, ღონისძიება 3 დეკემბერს, 21-თვიანი პაუზის შემდეგ გამართეს, რეგულაციებს მკაცრად იცავდნენ და იქ მხოლოდ მწვანე პასპორტის მქონე პირები დაიშვებოდნენ.