ალერგოლოგ-იმუნოლოგი, ბიძინა კულუმბეგოვი აცხადებს, რომ ისურვებდა, მწვანე პასპორტები საზოგადოებრივ ტრანსპორტშიც მოქმედებდეს.

"ის რეალური შედეგი, რაც ახლა არსებობს, რაც ძალიან სავალალო და ტრაგიკულია ჩვენი ქვეყნისთვის, გამომდინარეობს იმ მოცემულობიდან, რაც ქვეყანაშია. ერთი მხრივ, მწვანე პასპორტები, რომელიც დღეს ამოქმედდა გვაძლევს იმის იმედს, რომ იმ სივრცეებში, სადაც ინფექცია ყველაზე ხშირად ტრიალებს, გენერირდება და ერთი ადამიანი მეორე გადადებს, ბუნებრივია, უფრო მეტად იქნება გაკონტროლებული, თუმცა ვისურვებდი, რომ მწვანე პასპორტების მოქმედების არეალი უფრო ფართო იყოს, ის იყოს საზოგადოებრივ ტრანსპორტში, ასევე, მოეთხოვებოდეს დასაქმებულ ადამიანებს, სადაც არის კვების ობიექტები და თუნდაც მაღაზიები.

მე ვფიქრობ, რომ ეს იქნება შემდეგი ნაბიჯი, სხვანაირად მწვანე პასპორტების გავლენა ეპიდემიაზე, ბუნებრივია, ისეთი თვალსაჩინო ვერ იქნება", — განაცხადა მან საზოგადოებრივი მაუწყებლის ეთერში.

პირველი დეკემბრიდან ქვეყანაში ე.წ მწვანე პასპორტები ამოქმედდა. საკოორდინაციო საბჭოს მიერ მიღებული გადაწყვეტილებით, კორონავირუსის გადატანის შემდეგ ადამიანს მწვანე სტატუსი უვადოდ ენიჭება. გარდა ამისა, მწვანე სტატუსი აქვთ პირებს, ვინც:

  • ვაქცინირებულია სრულად;
  • ჩატარებული აქვს 72-საათიანი ვალიდურობის PCR ტესტი;
  • ჩატარებული აქვს 24-საათიანი ვალიდურობის ანტიგენ ტესტი;

25 ნოემბერს დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ განაცხადა, რომ გადაწყვეტილება, რომლის თანახმადაც, მწვანე სტატუსი კოვიდგადატანილისთვის უვადოა, შესაცვლელია.

გადაწყვეტილებას არც იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე ეთანხმება და აცხადებს, რომ უვადო მწვანე სტატუსზე საუბარი წარმოუდგენელია, რადგან კორონავირუსი არ არის წითელა, რომელსაც გადაიტან და მისგან მთელი ცხოვრება თავისუფალი იქნები.

ამავე თემაზე: