"პირველად გავიღიმე დიდი ხნის შემდეგ" — ასე ეხმაურება გიული ასალანია მისი შვილის, მიხეილ სააკაშვილის გორის სამხედრო ჰოსპიტალში გადაყვანის შეთავაზებას, რომელსაც ექსპრეზიდენტი დათანხმდა. მან მადლობა გადაუხადა დროას ლიდერს, ელენე ხოშტარიას და მოშიმშილე დეპუტატებს, ასევე უკრაინულ მხარეს, სახალხო დამცველს და მედიას.

"თუმცა, ჩემი თვალით სანამ არ დავინახავ, იქ ადგილზე რომ ნამდვილად არის ჩაყვანილი და იქ არის მოთავსებული, არ ვიცი, არ ვიცი. ჯერჯერობით ისეთ მდგომარეობაში ვარ, იმდენი იმედგაცრუება იყო ეს დღეები, ბოლოს და ბოლოს იქნა მიღებული ეს გადაწყვეტილება. მე მინდა მადლობა ვთქვა", — განაცხადა მან.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

დღეს, 19 ნოემბერს კი იუსტიციის სამინისტრომ მას გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშლობას შეწყვეტს.