პარტია დროას ლიდერის, ელენე ხოშტარიას განცხადებით, ორგანიზმში ინტოქსიკაცია დაიწყო, რის გამოც, ამ ეტაპზე გადასხმებს დათანხმდა. ამის შესახებ მან Facebook-ზე დაწერა და აღნიშნა, რომ უარი თქვა ჰოსპიტალიზაციაზე.

"ექიმმა მითხრა, რომ ორგანიზმში დაიწყო ინტოქსიკაცია და თუ ამ ეტაპზე რეგულარულ გადასხმებს (მედიკამენტოზურს და არა საკვები, ეს გამორიცხულია) არ გავიკეთებ, თირკმელი ვერ გაუძლებს. შემომთავაზა ჰოსპიტალიზაცია, ამაზე უარს ვამბობ. აქედან გამომდინარე დავთანხმდი ამ ეტაპზე გადასხმებს, როდესაც თირკმელის გაჩერების რისკი მოიხსნება, შევაჩერებ გადასხმებს", — წერს ხოშტარია.

ის ამბობს, რომ თავს კარგად გრძნობს და "გაჩერებას არ აპირებს", შიმშილობას არ წყვეტს და ითხოვს ყოფილი პრეზიდენტის, მიხეილ სააკაშვილის გადაყვანას სამოქალაქო კლინიკაში. ელენე ხოშტარია საკანონმდებლო ორგანოში მე-13 დღეა შიმშილობს.

გუშინ, 14 ნოემბერს ხოშტარიას ექიმმა, ვახტანგ კალოიანმა თქვა, რომ სისუსტე და ინტოქსიკაცია მეტადაა გამოხატული, თუმცა მისი თქმით, ეს შიმშილობის მე-12 დღეს მოსალოდნელი იყო. ექიმმა აღნიშნა ისიც, მდგომარეობა არ არის კრიტიკული, მაგრამ შიმშილობის ამ ტემპით გაგრძელება ხოშტარიას სიცოცხლისა და ჯანმრთელობისთვის პირდაპირი საფრთხე იქნება.