შინაგან საქმეთა სამინისტროს განცხადებით, 62-ე საარჩევნო უბანთან ნიკა მელიას ფიზიკური შეურაცხყოფა დაუდგენელმა პირმა მიაყენა. უწყება აცხადებს, რომ ფაქტზე გამოძიება დაიწყეს — სისხლის სამართლის კოდექსის 162-ე პრიმა მუხლის პირველი ნაწილით დაიწყეს, რაც საარჩევნო უბნის მიმდებარედ ჩადენილ ძალადობას გულისხმობს.

"ისნის 62-ე საარჩევნო უბანში, სადაც შეკრებილი იყვნენ სხვადასხვა საარჩევნო სუბიექტის მხარდამჭერები, თბილისის მერობის კანდიდატი — ნიკანორ მელია მხარდამჭერებსა და მედიასაშუალებების წარმომადგენლებთან ერთად მივიდა. ადგილზე ასევე იმყოფებოდნენ პოლიტიკური პარტია ქართული ოცნება — დემოკრატიული საქართველოს წარმომადგენლები და მხარდამჭერები.

საარჩევნო უბანში პოლიტიკური პარტიების წარმომადგენლებს შორის მოხდა სიტყვიერი დაპირისპირება, რა დროსაც ამ დრომდე დაუდგენელმა პირმა ნიკანორ მელიას მიაყენა ფიზიკური შეურაცხყოფა. ფაქტზე მიმდინარეობს გამოძიება", — აცხადებს შსს.

უწყება აცხადებს, რომ გამოძიებას შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარი სამმართველოს თანამშრომლები აწარმოებენ.

დღეს, 30 ოქტომბერს, ნაციონალური მოძრაობის თავმჯდომარესა და თბილისის მერობის კანდიდატს, ნიკა მელიას ვაზისუბნის 62-ე უბანთან ფიზიკური შეურაცხყოფა მიაყენეს. როგორც კადრებში ჩანს, მედიასთან განცხადების გაკეთებისას მას უცნობმა პირმა თავზე ხელი დაარტყა.