საოკუპაციო რეჟიმის წარმომადგენლებმა საქართველოს ორი მოქალაქე გაიტაცეს. სახელმწიფო უსაფრთხოების სამსახურის განცხადებით, რუსეთის საოკუპაციო ძალებმა ისინი ოკუპირებული სოფელ ლოპანის მიმდებარედ უკანონოდ დააკავეს.

"საოკუპაციო რეჟიმის მიერ განხორციელებული უკანონო დაკავებები წარმოადგენს დესტრუქციულ ქმედებას, რომელიც მიმართულია ადგილობრივი მოსახლეობის დაშინებისაკენ და მნიშვნელოვნად ართულებს ადგილზე არსებულ უსაფრთხოების გარემოს", — აცხადებენ სუს-ში.

მათი განცხადებით, მომხდარზე გააქტიურებულია ცხელი ხაზი და ინფორმირებულია ევროკავშირის სადამკვირვებლო მისია.