იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძის თქმით, დღეში 6 000-იან ინფიცირების ზღვარს თუ გადავცდებით, უკვე მე-5 ტალღა დაიწყება, რომელიც "კატასტროფული" იქნება.

"დღევანდელი მდგომარეობა შეიძლება განვიხილოთ, როგორც არ დასრულებული მე-4 ტალღა, შესაძლებელია, მაგრამ თუ ჩვენ უახლოესი კვირების განმავლობაში ციფრები ინფიცირებულების გაიზარდა და ჩვენ გადავაბიჯებთ, ძალიან ძნელია ამის წარმოდგენა, მაგრამ, ალბათ შესაძლებელი, 6 200-იან ზღვარს, მაშინ უნდა ვთქვათ, რომ საქართველოში ზუსტად ასე გვაქვს მე-5 ტალღა და ეს მე-5 ტალღა იქნება მართლაც კატასტროფული", — თქვა ჩხაიძემ.

ჯანდაცვის მინისტრმა ეკატერინე ტიკარაძემ კი 25 ოქტომბერს, თქვა, რომ მე-5 ტალღა გაცილებით მსუბუქი იქნება, ვიდრე მე-4. მას ამის ვარაუდის საშუალება მილიონამდე აცრილი ადამიანი აძლევდა.

მე-5 ტალღასთან დაკავშირებით აზრთა სხვადასხვაობა აქამდეც იყო. მაშინ, როდესაც დაავადებათა კონტროლის ცენტრის დირექტორი ამბობდა, რომ მე-5 ტალღა დაიწყო და რთულ ნოემბერს გვიწინასწარმეტყველებდა, ჯანდაცვის მინისტრის მოადგილე, თამარ გაბუნია აღნისშნავდა, რომ ჯერ მე-4 ტალღიდან ვერ გამოვედით.

28 ოქტომბრის მონაცემებით, საქართველოში კორონავირუსის 4 009 ახალი შემთხვევა დადასტურდა, გამოჯანმრთელდა — 5 177, ხოლო გარდაიცვალა — 45 ადამიანი.

სულ 2020 წლის 6 ოქტომბრიდან — მიმდინარე წლის 27 ოქტომბრის პერიოდში, სახელმწიფო საზღვრიდან საკარანტინე სივრცეებში გადაყვანილია — 25 269 პირი.