სამეგრელო-ზემო სვანეთის დაცვის პოლიციის თანამშრომელმა, გოჩა კვარაცხელიამ თანამდებობა პროტესტის ნიშნად დატოვა. როგორც სხვებმა, მხარდაჭერა კვარაცხელიამაც გამოუცხადა ლექსო რაფავას.

"ვმუშაობ დაცვის პოლიციის დეპარტამენტის უმცროსი ინსპექტორის თანამდებობაზე. პროტესტს ვუცხადებ პოლიციის თანამშრომლების უკანონოდ დაკავებულებს, ბატონ ლექსო რაფავასა და სხვა პოლიციელებს, აი, ამ გმირებს, ვინც უკანონოდ არიან დაკავებულები. მე ვტოვებ დაცვის პოლიციის დეპარტამენტს, დაცვის პოლიციის დეპარტამენტის ძალოვან სტრუქტურას", — თქვა კვარაცხელიამ.

გოჩა კვარაცხელია შსს-ს უკვე მე-8 თანამშრომელია, ვინც პროტესტის ნიშნად სამსახურიდან წავიდა. დღეს თანამდებობა დატოვა დაცვის პოლიციის თანამშრომელმა, საბა კოხალეიშვილმა. ხოლო გუშინ, 25 ოქტომბერს სამსახურიდან წავიდნენ, იმერეთში განსაკუთრებულ დავალებათა სამმართველოს ინსპექტორმა, რომან ანთიამ, სამეგრელოში კი სამეგრელო-ზემო სვანეთის საპატრულო პოლიციის პატრულ-ინსპექტორმა, პოლიციის მაიორმა გიორგი ბერიშვილმა და კრიმინალური პოლიციის თანამშრომელმა, ჯიმი გაგუამ.

მანამდე 21 ოქტომბერს სამსახურიდან წავიდა სამეგრელო-ზემო სვანეთის სასაზღვრო პოლიციის თანამშრომელი, რევაზ ლაზიშვილი, 22 ოქტომბერს კი, შსს-ს გენერალური ინსპექციის დეპარტამენტის ოპერატიული უზრუნველყოფის მეორე სამმართველოს უფროსის მოადგილე, ჭაბუკა რაფავა. 23 ოქტომბერს თანამდებობა დატოვა სამეგრელოში პატრულ-ინსპექტორმა, ომარ არქანიამაც.

20 ოქტომბერს, ღამით ხობში ორი ყოფილი ძალოვნის, ლექსო რაფავასა და რუსლან შამახიას საცხოვრებელი სახლები გაჩხრიკეს. რაფავა დააკავეს, შამახიას თქმით კი, წაიღეს მის სახელზე გაფორმებული იარაღი. ენმ აცხადებს, რომ ლექსო რაფავას იარაღი და ხელყუმბარა ჩაუდეს. შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ ჟურნალისტების კითხვას მომხდართან დაკავშირებით უპასუხა, რომ სტანდარტული საპოლიციო ღონისძიებები განხორციელდა. სხვა კომენტარს შსს ამ ეტაპზე არ აკეთებს.