მიხეილ სააკაშვილის ადვოკატის, გიორგი გელხაურის ინფორმაციით, ექსპრეზიდენტი სუსტადაა. გელხაურის თქმით, სააკაშვილის ჯანმრთელობის მდგომარეობის დამძიმების საფრთხე იმ შემთხვევაშიც არის, თუ მას ქირურგიული ჩარევა არ დასჭირდა.

"ჯანდაცვის მინისტრს თუ დავუჯერებთ ჩვენ, მოშიმშილე ადამიანს თუ ოპერაცია არ დასჭირდა, ამ შემთხვევაში არ გადაიყვანენ კლინიკაში. ოპერაციის გარეშეც ადამიანის ჯანმრთელობის მდგომაროება შეიძლება მნიშვნელოვნად დამძიმდეს", — განაცხადა გელხაურმა.

გელხაურის ინფორმაციითვე, სააკაშვილის ჯანმრთელობის მდგომარეობას ქართველებთან ერთად ჰოლანდიელი და უკრაინელი მედიკოსებიც შეისწავლიან.

ჯანდაცვის მინისტრის, ეკატერინე ტიკარაძის განცხადებით, თუ მიხეილ სააკაშვილს სამედიცინო ქირურგიული ჩარევა დასჭიდება, სხვა პაციენტების მსგავსად, სხვა კლინიკაში გადაიყვანენ. მისივე თქმით, ახლა არ დგას იმის არანაირი საჭიროება, რომ ექსპრეზიდენტის ჰოსპიტალიზება არა ციხის სამედიცინო დაწესებულებაში, არამედ სხვა კლინიკაში მოხდეს.