ადვოკატი, სერგი ხურციძე 5 ივლისს ძალადობაში ბრალდებული დავით კუტალაძის პატიმრობის გირაოთი შეცვლას მოითხოვს. პროცესი საქალაქო სასამართლოში ამ წუთებში მიმდინარეობს, სადაც მტკიცებულებების დაუშვებლობაზე და მოთხოვნის შემთხვევაში, აღკვეთის ღონისძიების შეცვლაზე იმსჯელებენ.

მიუხედავად იმისა, რომ 5 ივლისის ძალადობრივი კონტრაქციის შემდეგ, კუტალაძე აქტიურად ავრცელებდა ძალადობრივ მოწოდებებს, ემუქრებოდა მედიასა და აქტივისტებს, ადვოკატმა, პროცესის დაწყებამდე განაცხადა, რომ საქმეში არ დევს კადრები, სადაც კუტალაძის მიერ ძალადობისკენ მოწოდება ან ვინმესთვის ფიზიკური შეურაცხყოფა ჩანს.

"ზოგადად, მოწოდება იმდღევანდელი არსად არ ჩანს კადრებში. ჯგუფური ძალადობა აქვს წარდგენილი ყველას აბსოლუტურად, ყველას აქვს, მაგრამ ორგანიზატორებად ისინი შერაცხულები არ არიან. არანაირად არ გამოდის ორგანიზატორი დავით კუტალაძე, ამას არც არავინ არ ედავება მას, სასამართლოზე წარმოდგენილი მტკიცებულებებით, პროკურატურამ საკმაოდ უხვად წარმოგვიდგინა ბრალები სასამართლოში, საკმაოდ სერიოზული ბრალები, თუმცა არანაირი მტკიცებულებით ეს ბრალები გამყარებული არ არის. მსგავს კადრებს მე საქმეში არ ვიცნობ, არ დევს სისხლის სამართლის საქმეში მსგავსი კადრები, რომ დავით კუტალაძე ვინმე მოუწოდებს ძალადობისკენ", — განაცხადა ადვოკატმა.

TV პირველის გადამღებ ჯგუფზე, ლექსო ლაშქარავასა და მირანდა ბაღათურიაზე ძალადობაში ბრალდებულს, დათო კუტალაძეს აღკვეთის ღონისძიების სახით პატიმრობა 13 ივლისს შეეფარდა.

კუტალაძე 13 ივლისს სასამართლოზე სიტყვით გამოსვლისას ამბობდა, რომ ის არა მოძალადე, არამედ "ქართველი ვაჟკაცია". მიუხედავად იმისა, რომ მისი არაერთი ძალადობრივი მოწოდებაა ცნობილი, ის ამტკიცებს, რომ ჟურნალისტები ცდილობენ მისგან მოძალადე და "განტევების ვაცი" შექმნან. სასამართლოს დარბაზში ის ჰომოფობიურ განცხადებებსაც ავრცელებდა და ლგბტ თემს დამამცირებლად მოიხსენიებდა.

შსს-მ კუტალაძე 12 ივლისს ჟურნალისტის პროფესიულ საქმიანობაში ძალადობის მუქარით უკანონოდ ხელის შეშლის, ძალადობითა და ძალადობის მუქარით დევნის, ასევე, ჯგუფური ძალადობისთვის დააკავა.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურნალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლისს გარდაიცვალა. ამის გამო, მედიამ იმ დღესვე საპროტესტო აქცია გამართა, რადგან სახელმწიფომ მედიის და გამოხატვის უფლების დაცვა ვერ/არ უზრუნველყო და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა. აღსანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.