დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, მომხრეა, რომ ადამიანთა გარკვეული კატეგორიისათვის ვაქცინაცია იყოს სავალდებულო. მისივე თქმით, ევროპაშიც უამრავი ქვეყანაა, სადაც სეგმენტურად, გარკვეული კატეგორიებისთვის, ვთქვათ პროფესიული ნიშნით ვაქცინაცია სავალდებულოა.

პაატა იმნაძე, ასევე მომხრეა, რომ არავაქცინირებულთათვის გარკვეული სივრცეებში, სერვისების მიღება იყოს შეზღუდული, რადგან არავაქცინირებული ადამიანი არის საფრთხე.

"ასევე მომხრე ვარ, რომ იყოს გარკვეულ ადგილებში, არა სასიცოცხლოდ მნიშვნელოვან სერვისებზე ხელმისაწვდომობა იყოს შეზღუდული, ვთქვათ იმ ადამიანებისთვის, რომლებიც... აქ არ არის ლაპარაკი ვინ არის ვთქვათ აცრილი, ვინ არ არის, აქ ლაპარაკია იმაზე, ვინ წარმოადგენს საფრთხეს, როგორც თავის თავისათვის, პირველ რიგში, ასევე საზოგადოებისთვის.

ამიტომ ადამიანებს, რომლებიც წარმოადგენენ საფრთხეს თავის თავისთვის და საზოგადოებისთვის, ასეთ ადამიანებს, ასე ვთქვათ, უნდა ჰქონდეთ გარკვეული, ძირითადად გართობის ღონისძიებებზე მაგალითად. რა პრობლემაა, რომ ჰქონდეთ შეზღუდვა და ვერ შედიოდნენ. შევიდნენ ის ვინც არ წარმოადგენს საფრთხეს", — თქვა პაატა იმნაძემ რუსთავი2-ის ეთერში.

სავალდებულო ვაქცინაციასთან დაკავშირებით ცნობილია დაავადებათა კონტროლის ცენტრის დირექტორის ამირან გამყრელიძის პოზიცია, ის პედაგოგების სავალდებულო ვაქცინაციას მხარს უჭერს. ჯანდაცვის მინისტრის მოადგილე თამარ გაბუნია კი ამბობს, რომ ვაქცინაცია სავალდებულო ვერ იქნება, თუმცა გარკვეული მოთხოვნები, შესაძლოა, დაწესდეს.

19 ოქტომბრის მონაცემებით, საქართველოში სულ 1 920 934 აცრა ჩატარდა, სრულად ვაქცინირებული კი 907 106 ადამიანია.

ამ ეტაპზე ინფიცირების მიმდინარე აქტიური შემთხვევა 40 422 საიდანაც: მძიმე პაციენტია 1 247, მათ შორის, ხელოვნური სუნთქვის აპარატზე იმყოფება 284. 970 ადამიანი მოთავსებულია კლინიკურ-სასტუმროებში, 33 890 პირი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში იმყოფება 61 ადამიანი, თვითიზოლაციაში — 27 836 ადამიანი.

საქართველოში ამ დროისთვის 4 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.