ბათუმში, 26 მაისის ქუჩაზე ჩამონგრეული კორპუსის მომიჯნავე საცხოვრებელი სახლიდან 40-ზე მეტი ოჯახი ევაკუაცია მოხდა. როგორც ბათუმის მერიის პრესსამსახურში On.ge-ს უთხრეს, ოჯახების გაყვანა პრევენციის მიზნით განხორციელდა და მოქალაქეები ქირით სასტუმროში მანამ იცხოვრებენ, სანამ გამაგრებითი სამუშაოები არ ჩატარდება. მერიის განცხადებით, ამავე კორპუსის პირველ სართულზე ჩატარებული სარემონტო სამუშაოების განმეორებითმა ექსპერტიზამ დარღვევა გამოავლინა.

"დღეს დამიკავშირდა ჩვენი მერიის წარმომადგენელი. გვითხრეს, რომ დღევანდელი ექსპერტიზის, პირველადი დათვალიერების შედეგად ერთ-ერთ სადარბაზოში სიტუაცია ავარიულია, ამიტომ ხდება მოსახლეობის სრული ევაკუაცია. ორშაბათს გვეტყვიან კონკრეტულ ინფორმაციას. გამაგრებაზე არის საუბარი და ალბათ, სპეციალისტები დადებენ დასკვნას, თუ როგორ უნდა გამაგრდეს, რა გზით და ამის შემდეგ უკვე გაირკვევა დანარჩენი მოსახლეობის ბედი", — ამბობს კორპუსის ერთ-ერთი მცხოვრები TV პირველთან.

მერიაში, ასევე, აცხადებენ, რომ ოჯახები სასტუმროში გადაჰყავთ, რომლის თანხას თავად დაფარავენ.

8 ოქტომბერს, ბათუმში დატრიალებულმა ტრაგედიამ მთელი ქვეყანა შეძრა. 26 მაისის ქუჩაზე საცხოვრებელი კორპუსი ჩამოინგრა, რის შედეგადაც 9 ადამიანი დაიღუპა, გადარჩა ერთი. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

სამაშველო ღონისძიება თითქმის 30 საათის განმავლობაში მიმდინარეობდა.

10 ოქტომბერს პროკურატურამ განაცხადა, რომ ბრალდებულებმა მოშალეს როგორც არამზიდი, ასევე, მზიდი კონსტრუქცია (კედლები), რითაც საცხოვრებელი კორპუსის სიმტკიცე და მდგრადობა დაირღვა, რამაც შვიდსართულიანი კორპუსის ნგრევა გამოიწვია.