რუსთავის ციხეში გაჩენილ ხანძარზე საუბრისას ქართული ოცნების დეპუტატმა, ალუდა ღუდუშაურმა განაცხადა, რომ პენიტენციურ დაწესებულებებში არავინ არაფერს მალავს და წინა ხელისუფლების პერიოდში საპატიმროებში არსებული მდგომარეობა გაიხსენა. მან ჟურნალისტებს უთხრა ისიც, რომ ვერ ხვდება რის გამო "შფოთავენ".

"დღეს არავინ, არაფერს არ მალავს, მითუმეტეს ის, როდესაც ვინმე რამეს მალავდა სასჯელაღსრულების დაწესებულებებში და საპატიმროებში ადამიანებს წამებით კლავდნენ, ის დრო წარსულს ჩაბარდა. [...]

საბადრაგო სამსახურის უფროსი არ არის, ასე ვთქვათ, ინფორმაციის გავრცელებაზე პასუხისმგებელი პირი. ამიტომ შესაბამისი უწყების, შესაბამის სამსახურს მიმართეთ წერილობით და მიიღებთ პასუხს. რატომ შფოთავთ ვერ ვხვდები", — თქვა ღუდუშაურმა.

14 ოქტომბერს რუსთავის N17 პენიტენციურ დაწესებულებაში გაჩენილი ხანძრის დროს ორი პატიმარი გარდაიცვალა. ინფორმაცია უწყებამ მხოლოდ მეორე დღეს, მას შემდეგ დაადასტურა, როცა ადვოკატებმა და მედიამ გაასაჯაროეს. 15 ოქტომბერს სახალხო დამცველმა, ნინო ლომჯარიამ განაცხადა, რომ არც პენიტენციურმა და არც ინსპექტორის აპარატმა მომხდარის შესახებ არ აცნობეს.

სახალო დამცველი ამბობს, რომ დაშავებულებზე ინფორმაცია არ აქვს, რაც შეეხება გარდაცვლილებს, მისი თქმით, ისინი სასწრაფო დახმარების ბრიგადამ საავადმყოფოში გადაიყვანა, მაგრამ არ იცის კლინიკაში მიყვანამდე გარდაიცვალენ, თუ მანამდე.

ასევე, უცნობია გარდაცვალება დაკვამლიანებამ გამოიწვია თუ დამწვრობამ — უწყება ამ ეტაპზე მეტ დეტალს არ ასაჯაროებს. მომხდართან დაკავშირებით, სახელმწიფო ინსპექტორის სამსახურმა უსაფრთხოების წესების შესაძლო დარღვევაზე გამოძიება დაიწყო.