საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე სასულიერო პირების მიერ მიხეილ სააკაშვილის გათავისუფლების პეტიციაზე ხელის მოწერასთან დაკავშირებით ამბობს, რომ მათ მიერ გაკეთებული არცერთი განცხადება საპატრიარქოს პოზიციას არ ასახავს.

"საპატრიარქოს პოზიცია არ არის არცერთი განცხადება, რომელიც კერძოდ გააკეთეს მათ. ძირითადად, თქვენი ტელევიზიები არის, რომელიც აპირისპირებს ადამიანებს და ჩვენ გვეკითხებით ახლა შერიგებაზე? თქვენ სულ ითხოვთ, რომ საპატრიარქო არ იყოს პოლიტიკურ პროცესებში ჩართული, დღეს ითხოვთ, რომ საპატრიარქომ პოლიტიკური რაღაცა[...]", — აცხადებს ჯაღმაიძე.

მიხეილ სააკაშვილის გათავისუფლების პეტიციას რამდენიმე სასულიერო პირმა მოაწერა ხელი, მათ შორის მიტროპოლიტი იოსები, დეკანოზი თამაზ ლომიძე, მიტროპოლიტმა ნიკოლოზმა, ეპისკოპოსმა მელქისედეკმა, დედა სიდონიამ.

მიხეილ სააკაშვილი 14 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე: