ერთიანი ნაციონალური მოძრაობის წევრი, ზვიად კუპრავა დიღომში, ერთ–ერთ საარჩევნო უბანზე დააკავეს. ტელეკომპანია ფორმულას მიერ გავრცელებული ვიდეოში ჩანს, რომ კუპრავა საარჩევნო კომისიის წევრს ეკამათება და ამბობს, რომ მან ბიულეტინები ოთახიდან გამოიტანა.

"ეს არ არის ბიულეტენი, ეს სიყალბეა, ეს არის სიყალბე, ოთახიდან რატომ გამოიტანე ბიულეტენი, ოთახიდან რატომ გამოიტანე ბიულეტენი 2 ცალი", — უყვირის კუპრავა კომისიის წევრს.

კომისიის სხვა წევრი კი ამბობს, რომ ბიულეტენი მას შენახული ჰქონდა, რაზედაც კუპრავა განმარტებებს ითხოვს, თუმცა სიტუაცია იძაბება და ის პოლიციას იძულებით გაჰყავს.

როგორც შინაგან საქმეთა სამინისტრომ On.ge–ს განუცხადა, კუპრავა ადმინისტრაციული სამართალდარღვევათა კოდექსის 166–173 მუხლით დააკავეს, რაც წვრილმან ხულიგნობასა და პოლიციის მიმართ დაუმორჩილებლობას გულისხმობს.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.