თბილისში ოკუპირებულ აფხაზეთში უკანონო პატიმრობაში მყოფი ირაკლი ბებუას მხარდასაჭერი კიდევ ერთი აქცია გაიმართა.

როგორც ირაკლი ბებუას ბიძაშვილმა, თამუნა ბებუამ განაცხადა, მათ დღეს, 30 სექტემბერს შეხვედრა ჰქონდათ.

"დღეს გვქონდა მთავრობის ადმინისტრაციის უფროსთან შეხვედრა, რაზეც მთავრობის პასუხი შაბლონურად ის იყო, რომ ისინი აკეთებდნენ ყველაფერს ირაკლის დასახმარებლად, რომ ჩართულია საერთაშორისო თანამეგობრობა ამაში. კონკრეტული გეგმა და პასუხები იმისა, თუ როდის მოხდება ირაკლის გათავისუფლება, ჩვენთვის არავის არ უთქვამს, ასევე, მესიჯი იყო ჩვენთვის, რომ ბატონი ირაკლი ღარიბაშვილი ოქტომბრის თვეში შეძლებდა ჩვენთან შეხვედრას და კონკრეტული პასუხების გაცემას ამ თემასთან დაკავშირებით", — განაცხადა მან.

თამუნა ბებუას თქმით, ისინი აპირებენ აქციების გაგრძელებას და არ გაჩერდებიან იქამდე, სანამ ირაკლი ბებუა არ გათავისუფლდება.

"ჩვენ ვაგრძელებთ აქციებს, ჩვენი ოჯახი არ გაჩერდება იქამდე, სანამ ირაკლი არ იქნება გათავისუფლებული და გადმოყვანილი საქართველოს კონტროლირებად ტერიტორიაზე. ჩვენ, ასევე, ვაანონსებთ უახლოეს მომავალში აქციებს უფრო ფართომასშტაბიანს და ვიმედოვნებთ, რომ ყველა შემოგვიერთდება", — ამბობს ის.

30 სექტემბერს საქართველოს მოქალაქე ირაკლი ბებუა გალის რაიონში აფხაზური ე.წ. რესპუბლიკის დროშის დაწვისთვის დააკავეს. ამ ფორმით მან გააპროტესტა "დამოუკიდებლობის" ზეიმი, რომელსაც ოკუპირებულ რეგიონში 30 სექტემბერს აღნიშნავენ.

დროშის დაწვისთვის ირაკლი ბებუას 9 წლით თავისუფლების აღკვეთა 7 დეკემბერს მიუსაჯესა.

გალის რაიონი ერთადერთი მხარეა აფხაზეთში, სადაც მოსახლეობის აბსოლუტურ უმრავლესობას ეთნიკურად ქართველები შეადგენენ. მიუხედავად იმისა, რომ 1992-93 წლებში აფხაზეთში ომის დასრულების შემდეგ, მათ გალის რაიონში, თავიანთ სახლ-კარში დაბრუნების უფლება მისცეს, ადგილობრივი ქართველების უფლებრივი მდგომარეობა ძალიან მძიმეა. იქ არსებული ეთნიკური ნიშნით დისკრიმინაციის გამო, აფხაზურ მხარეს ადამიანის უფლებათა დამცველი სხვადასხვა საერთაშორისო ორგანიზაცია აკრიტიკებს.