შინაგან საქმეთა სამინისტროს განცხადებით, დააკავეს 23 წლის ახალგაზრდა, რომელიც ტრანსგენდერ ქალს ფიზიკურად გაუსწორდა და სახის არეში დაზიანებები მიაყენა. შსს-ს ინფომაციით, დაშავებული სამედიცინო დაწესებულებაში გადაიყვანეს, სადაც შესაბამისი დახმარება გაეწია.

"თბილისის პოლიციის დეპარტამენტის გლდანი-ნაძალადევის მთავარი სამმართველოს თანამშრომლებმა, ჩატარებული ოპერატიული და საგამოძიებო მოქმედებების შედეგად, 1998 წელს დაბადებული ლ.ბ. ძალადობის ბრალდებით დააკავეს. გამოძიებით დადგინდა, რომ ბრალდებული თბილისში, ურთიერთშელაპარაკებისას, ტრანსგენდერ ქალს ფიზიკურად გაუსწორდა და მას სახის არეში დაზიანებები მიაყენა", — ნათქვამია უწყების განცხადებაში.

მათივე ინფორმაციით, ძალადობის საქმეზე გამოძიება საქართველოს სისხლის სამართლის კოდექსის 126-ე მუხლით მიმდინარეობს. დანაშაული ერთ წლამდე ვადით თავისუფლების აღკვეთას ითვალისწინებს.

განახლება: მოგვიანებით ცნობილი გახდა, რომ დაკავებული, სავარაუდოდ ნაციონალური მოძრაობის კანდიდატის შვილია. გორის მუნიციპალიტეტის სოფელ კარბის მაჟორიტარობის კანდიდატი აცხადებდა, რომ მისი შვილი პოლიციამ, სავარაუდოდ, პოლიტიკური ნიშნით დააკავა.