ქართული ოცნების დეპუტატის, შალვა პაპუაშვილის განცხადებით, სამწუხაროა, რომ ევროკავშირის ელჩმა, კარლ ჰარცელმა ნიკა მელიას პროვოკაცია არ დაგმო და იმედოვნებს, რომ მელია და ნაციონალური მოძრაობა ელჩის განცხადებას პროვოკაციის წახალისებად არ მიიღებენ.

"სამწუხაროა, რომ მან ნიკა მელიას პროვოკაცია არ დაგმო, როგორც მე მივხვდი ამ განცხადებიდან, საუბარია, თითქოს პარტიის ორი ლიდერი ერთმანეთს დაუპირისპირდა. ყველა ხედავთ, პირდაპირ ეთერში რაც მოხდა. მოხდა ის, რომ ნიკა მელია მიეჭრა პირდაპირ ირაკლი კობახიძეს, როდესაც ის აკეთებდა კომენტარს და მიეჭრა ორჯერ, შემდეგ როცა მან მანქანისკენ გადაინაცვლა, იქაც მიეჭრა. ამიტომ, სამწუხაროა, რომ კარლ ჰარცელმა არ დაგმო ეს პროვოკაცია. კიდევ ერთხელ, მე იმედი მაქვს, რომ ნიკა მელია და ნაციონალური მოძრაობა ამ განცხადებას არ გაიგებს, როგორც წახალისებას მათი პროვოკაციებისა", — განაცხადა პაპუაშვილმა.

ევოკავშირის ელჩი საქართველოში, კარლ ჰარცელი გუშინ, 23 სექტემბერს ევროკავშირის წარმომადგენლობის ოფისის წინ ნიკა მელიასა და ირაკლი კობახიძეს შორის დაპირისპირების შესახებ განცხადებას ავრცელებს და წერს, რომ წუხს ამ ფაქტის გამო. მისი თქმით, მისასალმებელია კობახიძის მხრიდან ბოდიშის მოხდა.

გუშინ 23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.