სამედიცინო დაწესებულებების ინიციატივით ჯანდაცვის ასოციაცია იქმნება, რომელშიც 14 დაწესებულება/ჰოლდინგია გაწევრიანებული და საქართველოს თითქმის მთელ ტერიტორიას ფარავს.

"ასოციაცია, წევრობაზე დაფუძნებული, საერთო იდეის გარშემო შეკრებილი სამედიცინო დაწესებულებების გაერთიანებაა, რომელიც ღიაა ნებისმიერი სტაციონარული და ამბულატორიული სამედიცინო დაწესებულებისთვის.

ჯანდაცვის ასოციაციაში 14 სამედიცინო დაწესებულება/ჰოლდინგი უკვე გაწევრიანდა, რომელიც 80-მდე ჰოსპიტლისა და 35 ამბულატორიული სერვისის მეშვეობით, საქართველოს თითქმის მთელ ტერიტორიას ფარავს და 8000-მდე საწოლს და 22 000-მდე თანამშრომელს აერთიანებს", — ამბობენ ასოციაციაში.

მათივე განცხადებით, შეეცდებიან ცოდნისა და ხედვის გაზიარებით ერთად გადაჭრან ქვეყანაში არსებული მწვავე პრობლემები, მოამზადონ რეკომენდაციები ჯანდაცვის გრძელვადიანი სტრატეგიის დასაგეგმად, ხელი შეუწყონ საკანონმდებლო ცვლილებებს და ამ გზით შეამცირონ ის ხარვეზები, რაც ჯანდაცვის სისტემის განვითარებას და გაუმჯობესებას აფერხებს.

"ჯანდაცვის ასოციაცია, ძირითადად, ჯანდაცვის პოლიტიკის ისეთ საკითხებზე იმუშავებს, როგორიც არის ჯანდაცვის დაფინანსება, პირველადი ჯანდაცვის რგოლის გაძლიერება, სატარიფო პოლიტიკა, საწოლფონდის თანაფარდობა, სამედიცინო პერსონალის რაოდენობა და გადანაწილება, მომსახურების ხარისხი, სამედიცინო შეცდომის იდენტიფიცირებისა და რეაგირების მექანიზმების შექმნა, პაციენტის უფლებების დაცვა, სამედიცინო დაწესებულებების ეფექტური ფუნქციონირება პანდემიის პირობებში და სხვა.

ჯანდაცვის ასოციაცია გაახმოვანებს მასში შემავალი ორგანიზაციების ხედვას და შეასრულებს შუამავლის ფუნქციას სამედიცინო დაწესებულებებს, საზოგადოებასა და სახელმწიფოს შორის", — ამბობენ ისინი.

ორგანიზაციები ასოციაციაში გაწევრიანებას შეძლებენ ნებისმიერ დროს და თანაბარი ხმის უფლებით ისარგებლებენ.