ეს რომელიმე მძაფრსიუჟეტიანი ფილმი არ გეგონოთ — 39 წლის კაცი ზეწრებისგან გაკეთებული თოკით ავსტრალიის კოვიდსასტუმროდან გაიქცა. მან თოკი მეოთხე სართულის ფანჯრიდან ჩამოსასვლელად გამოიყენა.

კაცი დასავლეთ ავსტრალიის შტატში ორშაბათს ჩამოვიდა, თუმცა გამკაცრებული რეჟიმის გამო, შტატში შესვლის უფლება ვერ მიიღო. მას შტატი 48 საათში უნდა დაეტოვებინა, ამიტომ კოვიდსასტუმროში გაუშვეს. იმავე ღამეს სასტუმროდან გამოიქცა, თუმცა პოლიციამ იგი დილითვე დააკავა. პოლიციის თქმით, კაცს კორონავირუსი არ დაუდასტურდა.

შემთხვევა ქვეყანაში ეპიდსიტუაციის გაუარესების ფონზე მოხდა. ახალი სამხრეთ უელსის, ვიქტორიისა და სამხრეთ ავსტრალიის შტატებში დელტა შტამის გავრცელების გამო, აღნიშნულ შტატებში მოსახლეობა ლოქდაუნშია, დანარჩენ შტატებში კი ვირუსის გავრცელების თავიდან ასაცილებლად შეზღუდვები გამკაცრებულია.