ახალი ტექნოლოგიების გამოყენება თანასწორობის მისაღწევად — ეს იქნება სამდღიანი ჰაკათონის მთავარი თემა, რომელიც თბილისში 18-20 ივნისს ევროპის საბჭოს საქართველოს ოფისისა და ფორსეტის ორგანიზებით გაიმართება.

ჰაკათონში მონაწილეობა უფასოა და შეუძლია ნებისმიერ დაინტერესებულ სტატისტიკოსს, გრაფიკულ დიზაინერს, დეველოპერს, კომუნიკაციის სპეციალისტს, მკვლევარს, მონაცემებითა და თანასწორობის საკითხებით დაინტერესებულ ადამიანს.

თანასწორობის ჰაკათონის მიზანია, ისაუბროს და გააზიაროს ინფორმაცია დისკრიმინაციული პრაქტიკისა და მისი უარყოფითი გავლენის შესახებ, მონაცემებზე დაფუძნებული ციფრული პროდუქტების გამოყენებით.

ღონისძიების ფარგლებში 2-6 ადამიანისგან შექმნილი გუნდები მენტორებთან ერთად იმუშავებენ ისეთი ინოვაციური პროდუქტების შექმნაზე, რომლებიც დისკრიმინაციის აღმოფხვრისა და თანასწორობის მხარდაჭერისკენ იქნება მიმართული. გამარჯვებულ გუნდს ან გუნდებს გადაეცემათ ფულადი პრიზი.

მთავარ ღონისძიებამდე ჰაკათონის თვე დატვირთული იქნება სხვადასხვა ტრენინგითა და ვორკშოპით მონაცემთა ვიზუალიზაციისა და თანასწორობის თემატიკაზე. ტრენინგები 1, 7 და 10 ივნისს გაიმართება. მონაწილეობის მსურველებმა დამატებითი ინფორმაცია შეუძლია ნახონ ForSet-ის ფეისბუქგვერდზე.

ჰაკათონის ფარგლებში შეიქმნება ისეთი პროდუქტები, როგორებიცაა:

  • ინტერაქტიული ვიზუალიზაცია;
  • ინფოგრაფიკების სერია;
  • მობილური ან ვებ თამაში;
  • ქვიზი;
  • მობილური ან ვებაპლიკაცია;
  • ანიმაციური ვიდეო;
  • სოციალური ექსპერიმენტი და სხვა.

ჰაკათონში მონაწილეობის მისაღებად აუცილებელია სარეგისტრაციო ფორმის შევსება 11 ივნისამდე. მონაწილეები შეირჩევიან შევსებული აპლიკაციების საფუძველზე.

ჰაკათონი ორგანიზებულია ევროპის საბჭოს საქართველოს ოფისისა და ფორსეტის მიერ, საქართველოს ინოვაციებისა და ტექნოლოგიების სააგენტოსა და News.On.ge-ისთან პარტნიორობით.