დისნეის უამრავი მულტფილმი აქვს შექმნილი, რომელთა ჯადოსნურ ისტორიებზე არაერთი თაობა გაიზარდა. ანიმაციების ზღაპრული სამყაროდან ბევრ გამორჩეულ, საინტერესო და დასამახსოვრებელ გმირს ვიცნობთ, რომლებმაც ყველა ასაკის მაყურებელს შეაყვარეს თავი.

ყველასთვის განსაკუთრებით კარგად ცნობილია დისნეის პრინცესები, თუმცა მათ შორის იშვიათად საუბრობენ ხოლმე მოანაზე.

სწორედ ამის გამო, ამ სტატიაში ვეცდებით დავამტკიცოთ, რომ მოანა ერთ-ერთი ყველაზე გამორჩეული პრინცესაა, რომელიც ჩვენგან გაცილებით მეტ ყურადღებას იმსახურებს.

1. მოანას გადასარჩენად პრინცი არ სჭირდება

დისნეის ისეთ ცნობილ პრინცესებს, როგორებიც კონკია და ფიფქია არიან, პრინცი გადაარჩენთ. არიელი საერთოდ უარს ამბობს თავის იდენტობაზე სიყვარულის გამო. მულანი, მართალია, ძლიერი პერსონაჟია, თუმცა მისი ამბავი ბოლოს მაინც სიყვარულის პოვნით გვირგვინდება. აი, მოანას ამბავში კი სასიყვარულო ობიექტს არც კი ვხვდებით და მთლიანად მის დამოუკიდებელ თავგადასავალს ვეცნობით.

2. ის საუკეთესო მაგალითია, თუ როგორ შეიძლება იპოვოს თავდაჯერება გმირმა ქალმა

მართალია, მამამისი წინააღმდეგობას უწევდა, თუმცა მან გულის ხმას მოუსმინა, არ შეუშინდა დაბრკოლებებს და დასახული მიზნის მისაღწევად ყველა ეჭვს აქცია ზურგი.

3. მისი სხეულის ფორმები გაცილებით რეალისტურია

დისნეის პრინცესების უმეტესობა ზედმეტად ნაზი, გამხდარი და სიფრიფანაა. მოანას სხეული კი სილამაზის მავნე სტანდარტებს უფრო ეწინააღმდეგება და გაცილებით ბუნებრივ პროპორციებს გვაჩვენებს.

4. ის შეგვახსენებს, რომ მოხუცებს პატივი უნდა ვცეთ

დასავლეთისგან განსხვავებით, სადაც ასაკის მატების ირაციონალურად ეშინიათ, სხვა უამრავ კულტურაში მოხუცებს განსაკუთრებულ პატივს სცემენ, რადგან ისინი დაგროვილი სიბრძნის წყაროდ ითვლებიან. სწორედ ამის კიდევ ერთი დადასტურებაა ანიმაცია მოანაც.

5. მოანა ძალისხმევას არ იშურებს, რომ ცოდნა შეიძინოს

დისნეის ბევრ პერსონაჟს თანდაყოლილი უნარები აქვს, თუმცა მოანა ნელ-ნელა ვითარდება, რომ მიზანს მიაღწიოს: თავიდან არც კი იცის, როგორ უნდა გაცუროს ზღვაში, მაგრამ მაუის ინსტრუქციებს ყურადღებით უგდებს ყურს და მუყაითად სწავლობს კიდეც.

6. ის კეთილი, დიდსულოვანი და მამაცია

როცა ჯერ კიდევ სულ პატარა ბავშვი ცდილობს, რომ კუ ფრინველების ლუკმად გახდომას გადაარჩინოს და ოკეანემდე მიღწევაში დაეხმაროს, კარგად ჩანს, თუ როგორი კეთილშობილი პერსონაჟია. შემდეგ კი ის გამოწვევებს იმისთვის კი არ უპირისპირდება, რომ დიდება და სახელი მოიხვეჭოს, არამედ თავისი ხალხის გადარჩენა სურს.

7. ის საუკეთესო მეგობარია

მართალია, მაუი თავდაპირველად მოანას ძალიან უხეშად ექცევა, თუმცა მოანა მასთან დამეგობრებას ახერხებს, მეტიც — საკუთარი თავის მიმართ პატივისცემის დაბრუნებაშიც კი დაეხმარება. კარგი მეგობარი სწორედ რომ ასეთ გავლენას უნდა ახდენდეს სხვებზე.

8. ის აფასებს თავისი ხალხის ისტორიას და გამოცდილებიდან სწავლობს

ანიმაცია პოლინეზიური ლეგენდების მიხედვით შეიქმნა და როგორც მთავარი პერსონაჟის სახის შექმნისას, ისე მისი შემდგომი ისტორიის განვითარებისასაც აქტიურადაა გამოყენებული კულტურული ელემენტები.

9. მოანა კი არ კლავს ანტაგონისტს, არამედ ეხმარება მას

როგორც წესი, კეთილი პერსონაჟი ანადგურებს ბოროტს საბოლოო შერკინებისას, თუმცა არა მოანა: ის ერთი შეხედვით შემზარავი ურჩხულის მიმართაც კი იჩენს თანაგრძნობას და ეხმარება, რომ ძველი სახე დაიბრუნოს.

10. მოანა უფრთხილდება დედაბუნებას

დღეს, როცა კლიმატის ცვლილება მთელი კაცობრიობის ერთ-ერთი ყველაზე მწვავე პრობლემაა, ეს გზავნილი განსაკუთრებით მნიშვნელოვანი, დასაფასებელი და საყურადღებოა.