Disney+-მა ანიმაციური ფილმის, Monsters, Inc.-ის სპინოფ სერიალის — Monsters At Work-ის პირველი თიზერი გამოუშვა. როგორც თიზერიდან ჩანს, ახალ სერიალში ძველი გმირები — სალი და მაიკი ბრუნდებიან, რომლებიც კომპანიას უხელმძღვანელებენ. თიზერი ძველ გმირებთან ერთად ახალ პერსონაჟებსაც წარმოგვიდგენს.

Monsters At Work-ში მოქმედება იმ დღის შემდეგ ვითარდება, რაც მონსტრების კორპორაცია ქალაქ მონსტროპოლისისთვის ელექტროენერგიის მომარაგებას ბავშვების სიცილიდან იწყებს. ამის მიზეზი მაიკისა და სალის აღმოჩენაა, რომლის მიხედვითაც, სიცილით, ტირილთან შედარებით, ათჯერ მეტი ენერგიის გამომუშავებაა შესაძლებელი.

ფოტო: Disney

Monsters At Work ტაილერ ტასკმონის, ახალგაზრდა მონსტრის შესახებ გვიამბობს, რომელმაც მონსტრების უნივერსიტეტი წარმატებით დაასრულა და ყოველთვის ოცნებობდა, შემშინებელი ყოფილიყო. თუმცა მას შემდეგ, რაც საოცნებო ადგილას მუშაობის შესაძლებლობა ეძლევა, აღმოაჩენს, რომ ენერგიის მოსაპოვებლად შეშინების ნაცვლად, სიცილი გამოიყენება.

ანიმაციური სერიალის პრემიერა Disney+-ზე 2 ივლისს შედგება.