ბოლო პერიოდის ერთ-ერთი საუკეთესო საშინელებათა ჟანრის ფილმის, A Quiet Place-ის მეორე ნაწილის გამოსვლას ჯერ კიდევ გასულ წელს ველოდით, თუმცა პანდემიამ სხვა ყველაფერთან ერთად ეს გეგმებიც შეგვიცვალა.

ახლა კი, როგორც იქნა, სულ ცოტა დრო გვაშორებს ჩუმი ადგილის მეორე ფილმის პრემიერამდე, თუმცა დარჩენილ დღეებს ახლახან გამოსული ფინალური ტრეილერი ჟანრის მოყვარულებისთვის კიდევ უფრო გაუსაძლისს გახდის.

რამდენადაც შთამბეჭდავი იყო ფილმის პირველი ტრეილერი, იმდენად ახალი კადრები პანდემიაგამოვლილი მაყურებლისთვის კიდევ უფრო ემოციური და სუნთქვისშემკვრელია:

2018 წელს გამოსული ჩუმი ადგილი, რომელიც პოსტაპოკალიპტურ სამყაროში ერთი ოჯახის გადარჩენისთვის ბრძოლაზე მოგვითხრობს, საოცრად წარმატებული პროექტი გამოდგა და რეჟისორმა ჯონ კრასინკიმ გაგრძელების გადაღებაც მალევე გადაწყვიტა.

როგორც ტრეილერიდან ჩანს, ახალი ფილმის სიუჟეტი სწორედ იქიდან გაგრძელდება, სადაც წინა ნაწილი დასრულდა, ამავდროულად კი უკეთ გავიგებთ, თუ როგორ დაიწყო ყველაფერი ამ შემზარავად ჩუმ სამყაროში.

აღსანიშნავია, რომ ჯონ კრასინკისა და ემილი ბლანტთან ერთად ვიხილავთ ისეთ ცნობილ ახალ სახეებსაც, როგორებიც Peaky Blinders-ის ვარსკვლავი კილიან მერფი და Guardians of the Galaxy-ის მსახიობი ჯიმონ ჰონსუა.

ფოტო: Paramount Pictures

ჩუმი ადგილი 2-ის პრემიერა 28 მაისს შედგება და იმედია, მისი ხილვა ქართულ კინოთეატრებშიც შეგვეძლება.